Թմրամիջոցների հետ կապված իրավիճակը մտահոգիչ է, Ազգային ժողովում այս մասին հայտարարեց Ներքին գործերի նախարար Վահե Ղազարյանը:
«Ունենք հայտնաբերման դրական ցուցանիշներ, որը և՛ գոհացնող է, և՛ մտահոգիչ: Մտահոգիչ է նրանով, որ շատ կան թմրամիջոցներ», - ասաց նա:
Ինչ վերաբերում է վերջին հայտնի դեպքերին, մասնավորապես, Հայաստան տեղափոխված 1 տոննա կոկաինի դեպքին՝ Ղազարյանն ասաց, թե, նախաքննությունից ելնելով, շատ բան չի ներկայացնի:
Հիշեցնենք` վարչապետ Նիկոլ Փաշինյանն Ազգային ժողովում հայտարարել էր, թե Հայաստան 1 տոննա կոկաին ներկրած ընկերության սեփականատերը ՀՀԿ-ական նախկին պատգամավոր է` Միհրան Պողոսյանը: Ըստ տեղեկությունների` նա ՌԴ-ում է:
ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը ՆԳ նախարարից հետաքրքրվեց` ռուս գործընկերոջ հետ այս հարցը քննարկե՞լ է, այդ մարդիկ ինչպե՞ս են հատել ՀՀ պետական սահմանը:
Վահե Ղազարյանը վստահեցրեց՝ բավականի մեծ աշխատանքներ են տարվում, 2 օր առաջ Հայաստանում էր ՌԴ Ներքին գործերի նախարարի առաջին տեղակալը, բավական երկար զրույց են ունեցել այս թեմայի շուրջ:
«Դրական արդյունքների մասին մոտ ժամանակներս հասարակությանը կիրազեկենք», - նշեց Ղազարյանը:
