Առողջապահության նախարարության երեկվա հաղորդագրությունն արժանացավ մեծ արձագանքի, այդ թվում՝ քննադատությունների։ ԱՆ-ն այսօր ստիպված է եղել նոր պարզաբանում տարածել կապված զենքի տիրապետման վերաբերյալ հրապարակման հետ:

«Հաշվի առնելով զենքի տիրապետման վերաբերյալ հրապարակման հետ կապված որոշ մեկնաբանություններ` նշենք.

Հրապարակման մեջ տեղ են գտել հիվանդությունների ընդհանրական անվանումները, իսկ դրանց մանրամասն նկարագրությունները կարելի է գտնել որոշման մեջ:

Օրինակ, կետերից մեկի` «ականջի, վերին շնչառական ուղիների հիվանդություններ» անվանումը ամենևին չի վերաբերում սուր շնչառական կամ սեզոնային բնույթ կրող հիվանդություններին, այլ սուր խանգարումների մասին է:

Խնդրում ենք պարզ մասնագիտական եզրույթները չդարձնել շահարկման առարկա:

Զենքը հատուկ վտանգավոր միջոց է, և դրա կրողը պետք է չունենա որոշակի հիվանդություններ, որպեսզի զենքի կրումը անվտանգ լինի շրջապատի համար»։

Հիշեցնենք, որ երեկ ԱՆ-ն հայտարարել էր, որ նախարարության առաջարկով վերանայվում է «Զենքի տիրապետմանը խոչընդոտող հիվանդությունների և ֆիզիկական թերությունների ցանկը հաստատելու մասին» որոշումը:

Փոփոխությունների համաձայն` զենք ձեռք բերելու, կրելու և օգտագործելու իրավունք չեն ստանում նրանք, ում մոտ առկա է`

1. հոգեկան խանգարումների տեսակներ

2. նյարդային համակարգի հիվանդություններ

3. վնասվածքների հետևանքներ

4. վիրաբուժական մի շարք հիվանդություններ, այդ թվում՝ մաշկի հետայրվածքային, հետվնասվածքային, հետվիրահատական տարածուն սպիներ` վերին վերջույթի շարժումները զգալի չափով սահմանափակող,

5. ողնաշարի և կրծքավանդակի հիվանդություններ

6. զարգացման արատներ

7. վնասվածքների հետևանքներ` ֆունկցիաների զգալի խանգարմամբ, ինչպես նաև ապրելակերպի հետ կապված խնդիրներ: