Ղազախստանն ու Ադրբեջանը արդյունավետորեն փոխգործակցում են տարբեր բազմակողմ կառույցների շրջանակներում, համանման դիրքորոշումներ ունեն միջազգային և տարածաշրջանային բազմաթիվ արդիական խնդիրների շուրջ, հայտարարել է Ղազախստանի նախագահ Կասիմ-Ժոմարտ Տոկաևը՝ Ադրբեջանի նախագահ Իլհամ Ալիևի հետ հանդիպումից հետո կայացած համատեղ մամուլի ասուլիսում։
Ինչպես հաղորդում է Ղազախստանի նախագահի մամուլի ծառայությունը, Տոկաևը անդրադարձել է նաև Հայաստանի և Ադրբեջանի միջև հարաբերությունների կարգավորման գործընթացին։
«Ղազախստանն ավանդաբար աջակցում է Ադրբեջանի և Հայաստանի միջև դիվանագիտական հարաբերությունների կարգավորմանը, ինչպես նաև ողջունում է հնարավորինս շուտ խաղաղության պայմանագիր կնքելուն ուղղված կողմերի ջանքերը։ Ընդհանուր առմամբ, Ղազախստանն ու Ադրբեջանը փոխադարձ աջակցությունը շարունակելու և տարածաշրջանում կայունությունն ու անվտանգությունն ամրապնդելու համար համատեղ միջոցներ ձեռնարկելու անհրաժեշտության շուրջ փոխըմբռնում ունեն»,- ասել է Տոկաևը։
