Ժամը 11:00-ի դրությամբ Հայաստանում կարմրուկի լաբորատոր հաստատված դեպքերի թիվը հասել է 20-ի, հոսպիտալացված է 19 քաղաքացի, 1-ը դուրս է գրվել, լրագրողների հետ հանդիպմանն իրավիճակը ներկայացրեց ՀՀ առողջապահության նախարար Անահիտ Ավանեսյանը։

Նա ասաց, որ բոլոր պացիենտների վիճակը միջին ծանրության է, բոլորը գտնվում են բժիշկների խիստ հսկողության տակ։

«Հիվանդներից 15-ը երեխա են, 5-ը՝ մեծահասակներ»,- նշեց նախարարը։

Կարմրուկը սուր վարակիչ հիվանդություն է, որը տարածվում է օդակաթիլային ճանապարհով։ Առաջին դեպքը Հայաստան  է  ներթափանցել արտերկրից, հիվանդը երեխա է եղել, որից հետո վարակվել են այլ անձինք։

Ստեղծվել է աշխատանքային խումբ, որը գլխավորում է ինքը՝ Ավանեսյանը։ Իրականացվում են հրատապ միջոցառումներ, նաև որոշակի փոփոխություններ են իրականացվում՝ ակտիվացնելու պատվաստումները։

«Շատ կարևոր է վաղ հայտնաբերումը, կոնտակտավորների հստակ պարզաբանումը, 72 ժամվա ընթացքում կոնտակտավորների պատվաստումը ու նրանց մեկուսացումը»,- նշեց Ավանեսյանը՝  ընդգծելով, որ կարմրուկի կանխարգելման ամենագործուն միջոցը պատվաստումն է։

Սահմանված է երկու դեղաչափով պատվաստում. առաջինը մեկ տարեկան երեխաներին, 2-րդ դեղաչափը՝ 4-ից մինչև 6 տարեկան։

Երկու դեղաչափով պատվաստված լինելու պարագայում վարակման հավանականությունը գրեթե բացառվում է։