Սիրո բարեխոս Սուրբ Սարգիս զորավարի, նրա Մարտիրոս որդու և 14 զինվորների տոնը, որն այս տարի նշվում է փետրվարի 4-ին, մեծ ժողովրդականություն է վայելում: Տոնի կապակցությամբ Արարատյան Հայրապետական թեմի առաջնորդանիստ Ս. Սարգիս եկեղեցում Ս. Պատարագ մատուցվեց թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի հանդիսապետությամբ, որից հետո իրականացվեց զինծառայողների օրհնության կարգ:

 Սուրբ պատարագի ավարտին զինվորները ստացան հաղորդություն, որից հետո Առաջնորդարանի դահլիճում տեղի ունեցավ զինծառայողների պարգևատրման արարողությունը:

Նավասարդ սրբազանի նախագահությամբ՝ միջոցառումը սկսվեց Տերունական աղոթքով, ապա հնչեց Հայաստանի Հանրապետության հիմնը, ինչից հետո Սրբազան հայրը նահատակված զինվորների հոգիների հանգստության աղոթք բարձրացրեց առ Աստված:

Նավասարդ արքեպիսկոպոս Կճոյանը, դիմելով զինվորներին և բոլոր ներկաներին, նշեց, որ այս նվիրական պահին միաբանողն ազգային սերն է:

«Այն սերը, որ կարող է բնորոշվել  մեկ հասկացությամբ՝  հայրենասիրություն, եղբայրասիրություն և միաբանություն: Սիրելի՛ զավակներ,  դուք հայրենյաց անվախ պաշտպաններն եք, կրողը այդ հզոր ոգու, և ամենօրյա հավատարմությամբ ծառայում եք հայրենիքին ու Աստծուն, քաջաբար և անհողդողդ կանգնում բարբարոս թշնամու առաջ: 

Մենք ձեր կողքին ենք մեր ամենօրյա աղոթք-խնդրանքներով, մեր սիրո բազում դրսևորումներով և հոգու ջերմությամբ: Միշտ հիշեք մի ամբողջ ազգ ամեն օր քաջալերվում է ձեզանով, ձեր արիությամբ և անկոտրում հավատքով: Մեր խոնարհումն ենք բերում ձեր մայրերին՝ քաջազուն զավակներ ծնելու և հայրենիքին  անմնացորդ նվիրաբերելու համար»,- ասաց Նավասարդ սրբազանը:

Սրբազանն ընդգծեց՝ այսօրվա մաղթանքն է, որ Տիրոջ քաջ վկա Սուրբ Սարգիսը բարեխոս լինի հայրենիքի անվտանգությունն ու սահմանը հսկող հայ զինվորին:

Արարատյան Հայրապետական թեմի առաջնորդական փոխանորդ գերաշնորհ Տեր Նավասարդ արքեպիսկոպոս Կճոյանի օրհնությամբ՝ ՀՀ պետական սահմաններում մարտական հերթապահություն իրականացնող լավագույն  20 զինծառայողներ պարգևատրվեցին թեմի հատուկ պարգևներով և խորհրդանշական նվերներով:  

Զինծառայողներից Էդգար Մխիթարյանն իր և ընկերների անունից շնորհակալություն հայտնեց գնահատանքի համար։ 

«Այս պարգևատրումը մեզ համար մեծ նշանակություն ունի և պարտավորեցնում է շարունակել պատվով, նվիրումով և Աստծո զորությամբ կատարելու հայրենիքի պաշտպանության առաքելությունը»,- ասաց Էդգար Մխիթարյանը:

Միջոցառմանը ներկա էին Արմավիրի թեմի առաջնորդ Գերաշնորհ Տ. Սիոն արքեպիսկոպոս Ադամյանը, ՀՀ ՊՆ խորհրդական Ռազմիկ Պետրոսյանը, Արցախի Հանրապետության նախագահի խորհրդական Արտակ Բեգլարյանը, Արցախի Մարդու իրավունքների պաշտպան Գեղամ Ստեփանյանը, բարձրաստիճան զինվորականներ, ժամկետային  զինծառայողներ, վերջիններիս ծնողներն ու հարազատները:

Սբ. Սար­գիսն իր որ­դի Մար­տի­րո­սի և 14 քաջ մար­տիկ­նե­րի հետ նա­հա­տակ­վե­լով հանուն քրիստո­նեա­կան հա­վատ­քի՝ հե­տա­գա­յում դար­ձավ Հայ Ա­ռա­քե­լա­կան եկեղեցու ամենասիրե­լի սրբե­րից մե­կը: Ն.Ս.Օ.Տ.Տ Գա­րե­գին Երկրորդ Ա­մե­նայն Հա­յոց Հայրապետի բարձր տնօ­րի­նութ­յամբ Սբ. Սար­գիս զորա­վա­րի տո­նը հռչակ­վել է Երիտասարդնե­րի օրհնութ­յան օր: 2006 թ. ա­ռաջ­նոր­դա­կան փո­խա­նորդ Տ. Նա­վա­սարդ ար­քե­պիս­կո­պոս Կճոյա­նի նախաձեռնութ­յամբ սկիզբ դրվեց Սբ. Սարգ­սի տո­նի շրջանակնե­րում կազմակերպ­վող նոր ծրագրերի և մի­ջո­ցա­ռում­նե­րի՝ տոնին երբեմնի ժողովրդականությունը վերադարձնելու նպատակով: