Այսօրվա հավաքի նպատակն է նախ ցույց տալ, որ եղել ենք, կանք ու կլինենք Արցախի կողքին, Արցախի ժողովրդի, նրա ինքնորոշման կողքին, արցախահայության կողքին, որն ամուր կանգնած է իր հողում ու ոչ մի վայրկյան նահանջի մասին չի մտածում: Այս մասին, այսօր՝ դեկտեմբերի 28-ին, Մատենադարանի մոտ ՀՅԴ երիտասարդների երթի մեկնարկին հայտարարեց ՀՅԴ անդամ Սևակ Նազարյանը։
Նրա խոսքով, Լաչինի միջանցքը փակելուց ի վեր քաղաքացիներ, առանձին խմբեր օրեր շարունակ բողոքի գործողություններ են իրականացրել տարբեր երկրների դեսպանատների դիմաց՝ կոչերով, բողոքներով ցանկացան միջազգային հանրության ուշադրությունը կենտրոնացնել Արցախի ժողովրդի խնդրին։
«Այս գործողությունները եղել են տեղին, ժամանակին, հուսով եմ՝ ինչ-որ չափ նաև արդյունավետ են եղել։ Բայց այսօր մենք այստեղ ենք՝ մեղավորության սլաքն ուղղելու դեպի Հայաստանի Հանրապետության փաստացի իշխանությունը, որովհետև այս իշխանությունն է պատասխանատու արցախահայության իրավունքների ապահովման համար՝ որպես ՀՀ շուրջ 120 հազար մեր հայրենակիցների։ Այս իշխանությունն է մեղավոր, որ Արցախը, Հայաստանը, հայ մարդը այսօր հայտնվել են այսպիսի ծանր իրավիճակում: Մենք շատ լավ հասկանում ենք, որ այս իշխանությունը որեւէ դրական քայլ չի կարող անել: Բայց մենք մեր պահանջը հստակ ձեւակերպում ենք՝ կամ լուծեք այս հարցը, կամ եթե չեք կարող՝ հեռացեք իշխանությունից»,-ասաց նա:
Նշենք, որ երթը Մատենադարանից շարժվեց դեպի կառավարության շենք։
Ակցիայի մասնակիցների ձեռքին կան պաստառներ. «Ցույց տանք աշխարհին, որ հայը ապրելու իրավունք ունի», «Առանց Արցախ չկա խաղաղություն», «Ես հայրենիք եմ ուզում, դրա համար էլ դիմադրում եմ», «Բացեք Արցախի ճնապարհը», «Մեկ մարդ չի կարող որոել բոլորի ճակատագիրը», «Արցախի կողքին ենք», «Արցախը բեռ չէ, զրահաբաճկոն է»։
