Մերժենք Տարոնին ու իր «բարեկարգումը» կարգախոսով վաղը մի խումբ երիտասարդներ պատրաստվում են ակցիա իրականացնել։
«Վաղը ժամը 12:00-ին հավաքվում ենք Մյասնիկյանի արձանի մոտ և գնում ենք դադարեցնելու շինարարությունը և պահանջելու Տարոն Մարգարյանի հրաժարականը»,- նշված է նախաձեռնության հայտարարության մեջ:
Հիշեցնենք, որ այսօր համացանցում տարածվեցին Իտալիայի պուրակի լուսանկարները, որտեղ բարեկարգման աշխատանքներ են կատարվում։ Ֆեյսբուքի օգտատերերին բարկացրել էր այն, որ պուրակի ծառերը հատվել են, փոխարենը շինարարական աշխատանքներ են ընթանում։ Նշենք, որ քաղաքապետարանն այս առնչությամբ պարզաբանում է արել, որը ներկայացնում ենք ստորեւ․ «Հարգելի համաքաղաքացիներ, քիչ առաջ համացանցում տարածվեց լուսանկար, որում պատկերված է Երևանի 2800-ամյակի այգու շինաշխատանքների հրապարակը: Հիշեցնենք, որ այս տարվա փետրվարին արդեն իսկ առիթ ունեցել ենք սույնի հետ կապված տեղեկացնել, որ մայրաքաղաքի Իտալիայի և Բեյրութի փողոցների միջնամասում գտնվող այգում իրականացվող հիմնանորոգման աշխատանքների շրջանակում, մասնագիտական համապատասխան եզրակացությամբ, հատվել են չոր և ծերացած ծառեր: Միևնույն ժամանակ տեղեկացրել ենք, որ բարեկարգման աշխատանքների շրջանակում նախատեսված է այգին համալրել քառապատիկ ավել քանակությամբ նոր ու բարձրարժեք ծառերով, որոնք համահունչ են լինելու բարեկարգվող այգուն: https://www.yerevan.am/am/news/barekargvogh-aygin-hamalrvelow-e-bardzrarzhek-nor-tsarherov/ Ավելորդ չենք համարում հիշեցնել, որ դեռևս նախորդ տարվա դեկտեմբերին, Երևանի ավագանու որոշմամբ, հավանություն է տրվել Երևան քաղաքի Ալ. Մյասնիկյանի արձանի հետնամասում գտնվող Իտալիայի, Բեյրութի, Խորենացու և Գր. Լուսավորչի փողոցների սահմաններով պարփակված այգին «Վարդանյան ընտանիք» բարեգործական հիմնադրամի կողմից բարեկարգելու առաջարկին, որը կնվիրվի Երևան քաղաքի հիմնադրման 2800-ամյակին: Բացի այգու հիմնանորոգման աշխատանքներից, «Վարդանյան ընտանիք» բարեգործական հիմնադրամը պատրաստակամություն է հայտնել նաև հետագա տարիներին իր միջոցների հաշվին իրականացնել այգու շատրվանների ինժեներական և տեխնիկական սպասարկումը, սարք-սարքավորումների խոտանման դեպքում՝ դրանց վերականգնումը, փոխարինումը նորով, վնասված սալերի փոխարինումը և վերանորոգումը, ինչպես նաև կանաչ գոտիների խնամքն ու սպասարկումը: https://www.yerevan.am/am/news/vardanyan-entanik-baregortsakan-himnadrami-ajakts-owt-yamb-kbarekargvi-a-myasnikyani-ardzani-etnamas/ «Վարդանյան ընտանիք»-ի հետ ձեռքբերված պայմանավորվածության համաձայն այգում կարգելվի որևէ առևտրային գործունեության իրականացումը: «Վարդանյան ընտանիք» բարեգործական հիմնադրամը պարտավորվել է շինարարական և բարեկարգման աշխատանքներն ավարտել 2018 թվականի սեպտեմբերին»:
