Բրիտանական տնային տնտեսությունները լուրջ ծախսերի են բախվում՝ աճող ինֆլյացիայի, էներգետիկ ճգնաժամի եւ Ազգային սոցիալական ապահովագրման (National Insurance tax) հարկի ծրագրվող բարձրացման պատճառով։ Այդ մասին Sky News գործակալությանը հայտնել են Resolution Foundation (RF) անկախ վերլուծական կենտրոնի փորձագետները:

 

Փորձագետների կարծիքով՝ երկրում վառելիքի առավելագույն գինը կբարձրանա տարեկան 500 ֆունտ սթեռլինգով, իսկ էներգետիկ ընկերությունների սնանկացումը եւս 100 ֆունտ կավելացնի սպառողների վճարումներին։

 

Հավելյալ հարկային բեռը թագավորության բնակիչներից 600 ֆունտ սթեռլինգ կխլի։ Նման անհամաչափ ծախսերը կհարվածեն ցածր եկամուտ ունեցող ընտանիքներին, որոնք իրենց փողի մեծ մասը տրամադրում են էլեկտրաէներգիայի ծախսերը վճարելու համար, ասվում է հոդվածում։

 

Ինչպես նշում են RF փորձագետները, աշխատավարձերի աճը չի կարողանում հասնել ինֆլյացիայի հետեւից։ Մինչեւ 2022 թվականի վերջը միջին աշխատավարձն ընդամենը 0,1 տոկոսով կգերազանցի այժմյանին։ Միաժամանակ նոյեմբերին սպառողական գների ինդեքսը Մեծ Բրիտանիայում աճել է մինչեւ 5,1%, իսկ հոկտեմբերին այն կազմել է 4,2%։

 

Գործակալության գործադիր տնօրեն Թորսթեն Բելը համոզված է, որ բնակչության լճացած եկամուտների ֆոնին սննդամթերքները, ապրանքներն ու ծառայությունները կշարունակեն թանկանալ։ Նա ասել է, որ գնողունակության անկումն այնքան աղետալի կլինի, որ դժվար թե կառավարությունը կարողանա խուսափել ճգնաժամը հաղթահարելու համար միջամտությունից: