Երկուշաբթի առնվազն հինգ մարդ է զոհվել Դենվերում եւ մերձակա Լեյքվուդում (Կոլորադոյի նահանգ) հրաձգության ժամանակ։ Այս մասին տեղեկացնում է Fox News հեռուստաալիքի տեղի մասնաճյուղը՝ հղում կատարելով ոստիկանությանը։

Դենվերի ոստիկանապետ Փոլ Փեյզենի խոսքով՝ երեք մարդ դարձել է քաղաքի տարբեր մասերում հրաձգության զոհ, եւս երկու հոգի վիրավորվել է։ Հրաձգության հետեւանքով երկու մարդ է սպանվել նաեւ Լեյքվուդում, որտեղ ավելի վաղ, երեկոյան, անհայտ մեկը հրազենից կրակել է ոստիկանի վրա՝ վիրավորելով նրան։

Նախնական տվյալներով՝ հրաձգության բոլոր դրվագները կապված են մեկ հարձակվողի հետ, որը մահացել է Լեյքվուդում ոստիկանության հետ բախման հետեւանքով եւ ներառվել է սպանվածների ընդհանուր թվի մեջ։