Ոստիկանությունը երեկվանից բերման է ենթարկում «Առուշ Առուշանյան» դաշինքի տարբեր կողմնակիցների: Այս մասին Tert.am-ի հետ զրույցում ասաց Գորիսի փոխհամայնքապետ Մենուա Հովսեփյանը՝ անդրադառնալով Գորիսի ՏԻՄ ընտրությունների ընթացքին:
«Բերման են ենթարկում առանց կոնկրետ պատճառի, անիմաստ, ինչ-որ կասկածների շրջանակում, հետո բաց են թողնում, բայց հիմք չեն ասում»,-ասաց Հովսեփյանը՝ հավելելով, թե այսօր ևս դաշինքի կողմնակցի են բերման ենթարկել:
Ավելի վաղ Հովսեփյանը լրատվամիջոցների հետ զրույցում տեսակետ էր հայտնել, որ ոստիկանական մեծ ուժեր են տարվել Սյունիք՝ վախի մթնոլորտ ստեղծելու համար:
Հիշեցնենք, որ Գորիսի քաղաքապետի թեկնածու Առուշ Առուշանյանն այժմ կալանավորված է, իսկ Մենուա Հովսեփյանն օրերս է 30 մլն դրամ գրավի դիմաց ազատ արձակվել:
Այսօր Գորիսից բացի ՏԻՄ ընտրություններ են ՀՀ 8 այլ համայնքներում ևս:
00:00:00
