Կիպրոսի արտգործնախարար Նիկոս Քրիստոդուլիդեսը Թուրքիայի նախագահին մեղադրել է Միջերկրական ծովի արեւելքում եւ Մերձավոր Արեւելքում Օսմանյան կայսրություն ստեղծելու փորձերի մեջ: Նրա խոսքով, աշխարհաքաղաքականության նկատմամբ նման մոտեցումը կարող է բացասաբար անդրադառնալ տարածաշրջանային անվտանգության վրա:
Նիկոս Քրիստոդուլիդեսը մատնանշել է Թուրքիայի ագրեսիվ պահվածքը ոչ միայն Կիպրոսում, այլեւ Սիրիայում, Իրաքում, Լիբիայում եւ տարածաշրջանի արաբական այլ երկրներում:
«Մենք տեսնում ենք Թուրքիայի արտաքին քաղաքականության ռազմականացում,- ասել է Քրիստոդուլիդեսը Associated Press-ին տված հարցազրույցում,- եւ դա մեծ մտահոգություն է պատճառում տարածաշրջանի բոլոր երկրներին»:
Քրիստոդուլիդեսը հիշել է Թուրքիայի նախկին արտգործնախարար Ահմեդ Դավութօղլուի «զրո խնդիր հարեւան երկրների հետ» քաղաքականությունը, որը նախագահ Ռեջեփ Թայիփ Էրդողանի ղեկավարած իշխող «Արդարություն եւ զարգացում» կուսակցության հիմնական գաղափարն է:
««Զրո խնդիր հարեւանների հետ»-ը ավարտվեց նրանով, որ Թուրքիան խնդիրներ ունեցավ բոլոր հարեւանների հետ»,- ասել է նա: «Չկա մի երկիր, որը խնդիրներ չունենա Թուրքիայի հետ»: «Այն, ինչ մենք տեսնում ենք Թուրքիայում, տարածաշրջանում Օսմանյան կայսրության նոր քաղաքականության խթանման փորձ է»,- ասել է կիպրացի նախարարը: «Թուրքիան ցանկանում է դառնալ տարածաշրջանային հեգեմոնիա»:
00:00:00
