Էստոնիայի խորհրդարանը Եվրամիության երկրներին կոչ է արել խստացնել Ռուսաստանի դեմ միջազգային պատժամիջոցները, որպեսզի ստիպեն կատարել իր միջազգային պարտավորությունները, մասնավորապես՝ մարդու իրավունքների ոլորտում: Այս մասին հայտնում է Korrespondent–ը՝ հղում տալով Էստոնիայի խորհրդարանի կայքում տեղադրված հայտարարությանը:
Էստոնացի պատգամավորները ԵՄ անդամներին կոչ են արել՝ պահպանել պատժամիջոցների կիրառման և իրականացման ընդհանուր քաղաքականությունը, ինչպես նաև այդ հարցում համագործակցել Միացյալ Նահանգների, Մեծ Բրիտանիայի և այլ ժողովրդավարական երկրների հետ:
«Եվրամիության ընդհանուր արտաքին քաղաքականությունը կոչված է պաշտպանելու անդամ պետությունների շահերը միջազգային հարաբերություններում ՝ հիմնվելով մեր ընդհանուր ժողովրդավարական արժեքների վրա», - ասված է հայտարարության մեջ:
Էստոնացի խորհրդարանականների կարծիքով՝ ԵՄ կառույցները պետք է լուրջ եզրակացություններ անեն ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելի Մոսկվա կատարած այցից:
Հիշեցնենք, որ Եվրամիությունը մշակում է Բելառուսի դեմ պատժամիջոցների չորրորդ փաթեթը և քննարկում է «Նավալնիի ցուցակը»։ Ավելի վաղ ԵՄ դիվանագիտության ղեկավար Ժոզեպ Բորելը, Մոսկվա կատարած այցից հետո, հայտարարել էր Ռուսաստանի Դաշնության նկատմամբ «դարի որոշման» մասին:
00:00:00
