COVID-19-ի դեմ ռուսական երկրորդ պատվաստանյութն է մտել շրջանառության մեջ

«Վեկտոր» կենտրոնի «ԷպիՎակԿորոնա» պատվաստանյութը մտել է քաղաքացիական շրջանառության մեջ: Այդ մասին հայտնել է «Ռոսպոտրեբնադզոր»-ի ղեկավար Աննա Պոպովան։

«Անցկացվում է պատվաստանյութի հետգրանցումային և կլինիկական փորձարկումների երրորդ փուլը: Պատրաստուկն արտադրում է մեր «Վեկտոր» կենտրոնը»,- ասել է նա՝ հանդես գալով ՌԴ վարչապետ Միխայիլ Միշուստինի խորհրդակցությանը: Ինչպես ճշտել է Պոպովան, ութ բժշկական կենտրոնների բազայի վրա «ԷպիՎակԿորոնա» է ստանում Ռուսաստանի հինգ սուբյեկտների երեք հազար մարդ: «Ընթացակարգից հետո բոլոր կամավորներին վարքի կանոնների թերթիկ են բաժանու»,– հավելել է նա:

COVID-19-ի կանխարգելման համար ռուսաստանյան երկրորդ պատվաստանյութը գրանցվել է հոկտեմբերի կեսերին: Այն ստեղծել են «Ռոսպոտրեբնադզոր»-ին առընթեր նովոսիբիրսկյան «Վեկտոր» կենտրոնում և անվանել «ԷպիՎակԿորոնա»: Դեղամիջոցը պետք է ներարկել երկու անգամ՝ միջմկանային, ոչ պակաս, քան 14-21 օր ընդմիջումով՝ 0,5 մլ չափաբաժնով: COVID-19-ի դեմ «Վեկտոր»-ի պատվաստանյութն անվճար կլինի ռուսաստանցիների համար: Արդեն առաջին փուլի արդյունքներով՝ պատրաստուկի թեստավորումն ապացուցել է լիակատար անվտանգությունը: Ինչպես նշում է «Վեկտոր» կենտրոնի կենդանախտային վարակների և գրիպի բաժանմունքի վարիչ Ալեքսանդր Ռիժկովը, պատվաստանյութը թեև COVID-19-ի դեմ մինչև կյանքի վերջն իմունիտետ չի ապահովում, բայց վարակից պաշտպանում է առնվազն կես տարի: «ԷպիՎակԿորոնա»-ի հետգրանցումային կլինիկական փորձարկումները Ռուսաստանի տարբեր տարածաշրջաններում կանցկացվեն 40 հազար կամավորների շրջանում, որոնցից 150-ը 60-ից բարձր տարիքի անձինք են: Պատվաստանյութի առաջին խմբաքանակը՝ 60 հազար հատ, կարտադրվի մոտ ժամանակներս: Ռուսաստանում և աշխարհում կորոնավիրուսի դեմ առաջին պատվաստանյութը «Սպուտնիկ V» կոչվող պատրաստուկն է, որը մշակվել է Գամալեայի անվան համաճարակաբանության և մանրէաբանության ազգային հետազոտական կենտրոնում՝ Ռուսաստանի ուղղակի ներդրումների հիմնադրամի հետ համատեղ: Այն ստեղծվել է մարդու ադենովիրուսային վեկտորների բազայի վրա։ Լուծույթը նախատեսված է միջմկանային ներարկման համար, հաղորդել է ՌԻԱ Նովոստին: