ՀՀ սննդամթերքի անվտանգության տեսչական մարմնի Շիրակի մարզային կենտրոնի տեսուչները Գյումրի քաղաքի մանրածախ եւ մեծածախ առեւտրի օբյեկտներում, ինչպես նաեւ հանրային սննդի կազմակերպություններում իրականացրած մշտադիտարկման ընթացքում դրանցից շատերում հայտնաբերել են «Կոկա-կոլա» ՓԲԸ-ի եւ «Ջերմուկ Ինթերնեյշնլ Պեպսի-Կոլա Բոտլեր» ՍՊԸ-ի կողմից արտադրված ժամկետանց գազավորված ըմպելիք՝ Կոկա-կոլա եւ Պեպսի-կոլա: Այս մասին հայտնում են Սննդամթերքի անվտանգության տեսչական մարմնից: Շիրակի մարզային կենտրոնի տեսուչների կողմից կազմվել են արձանագրություններ եւ ժամկետանց արտադրանքը հանվել է վաճառքից: Տնտեսվարողները ներկայացրել են պարտավորագրեր այն մասին, որ գազավորված ըմպելիքը մատակարարից ստացել են մեկ շաբաթ առաջ, եւ պարտավորվում են ժամկետանց ողջ խմբաքանակը վերադարձնել մատակարարին: ՍԱՏՄ բոլոր տարածքային ստորաբաժանումներին հանձնարարվել է սննդի շղթայի կազմակերպություններում ստուգել տվյալ ապրանքանիշների, ինչպես նաեւ այլ սննդամթերքի հնարավոր ժամկետանց խմբաքանակի առկայությունը: Սպառողներին հորդորում ենք ուշադիր լինել սննդամթերք գնելիս եւ, ժամկետանց ապրանք կամ այլ խախտում-անհամապատասխանություն նկատելիս, տեղեկացնել Սննդամթերքի անվտանգություն տեսչական մարմին: