Քրեակատարողական հիմնարկում գտնվող դատապարտյալի ազգականը խնդրել է Մարդու իրավունքների պաշտպանի աջակցությունը դատապարտյալի համար անհրաժեշտ հետազոտությունները եւ բուժումը կազմակերպելու հարցում: ՄԻՊ-ից  հայտնում են, որ դիմումատուն տեղեկացրել է, որ դատապարտյալին անհրաժեշտ է թերապեւտի, ակնաբույժի, մաշկաբանի, նյարդաբանի, ատամնաբույժի խորհրդատվություն եւ բուժում: Քննարկման ընթացակարգի շրջանակում Մարդու իրավունքների պաշտպանը գրություններ է հասցեագրել ՀՀ արդարադատության նախարարություն, ինչպես նաեւ Պաշտպանի ներկայացուցիչներն իրականացրել են չհայտարարված այց քրեակատարողական հիմնարկ եւ առանձնազրույց ունեցել դատապարտյալի հետ։ Արդյունքում, դատապարտյալն անցել է բժշկական հետազոտություններ, եւ նշանակվել են համապատասխան բուժումներ: Մարդու իրավունքների պաշտպանը հետեւել է նաեւ դատապարտյալի դեղորայքային բուժման ընթացքին։