ՀՀ կառավարությունը 50 մլն դրամ հատկացրեց Կրթության, գիտության, մշակույթի և սպորտի նախարարությանը՝ տարվա 10 լավագույն մարզիկներին պարգևատրելու համար:
ԿԳՄՍ նախարար Արայիկ Հարությունյանը նշեց, որ մրցույթն անցկացվել է նախորդ տարի: «Մրցույթի հաղթողների համար նախկինում խրախուսման միջոցներ հատկացված չեն եղել: Համատեղ քննարկման արդյունքում որոշում կայացվեց 10 լավագույն մարզիկներից յուրաքանչյուրին խրախուսել 5-ական մլն դրամով: Սա շատ հստակ ուղերձ է պրոֆեսիոնալ սպորտի ոլորտին հատկապես օլիմպիական տարում, որ պետությունը մեծ ուշադրություն է դարձնում մարզական արդյունքներին: Արդեն որոշել ենք, որ ամեն տարի այս գումարն ունենալու ենք բյուջեում և 10 լավագույն մարզիկներին պարգևատրելու ենք»,- ասաց նախարարը՝ ներկայացնելով այդ 10 մարզիկներին.
Արթուր Ալեքսանյան – հունահռոմեական ըմբշամարտ
Ռուբեն Ալեքսանյան – ծանրամարտ
Արթուր Ավետիսյան – մարմնամարզություն
Հովհաննես Բաչկով – բռնցքամարտ
Սլավիկ Գասպարյան – հունահռոմեական ըմբշամարտ
Տիգրան Կիրակոսյան – սամբո
Արսեն Հարությունյան – ազատ ոճի ըմբշամարտ
Սիմոն Մարտիրոսյան – ծանրամարտ
Գոռ Մինասյան – ծանրամարտ
Հակոբ Մկրտչյան – ծանրամարտ:
Պարգեւատրումը տեղի կունենա վաղը՝ փետրվարի 21-ին:
