Միացյալ Նահանգների նախագահ Դոնալդ Թրամփի վարչակազմն առաջարկում է մինչև 2,4 մլրդ դոլարի մաքսատուրք սահմանել ֆրանսիական արտադրության ապրանքերի, այդ թվում՝ ռոկֆոր տեսակի պանրի, կոսմետիկ պարագաների, պայուսակների և գինու ներկրման համար: Ինչպես հայտնում է The Guardian-ը, ըստ ամերիկյան կողմի՝ դա պետք է արվի ի պատասխան նրա, որ Ֆրանսիան հավելյալ հարկեր է սահմանել ամերիկյան տեխնոլոգիական «հսկաների», այդ թվում՝ Google-ի, Amazon-ի և Facebook-ի նկատմամբ: Ամերիկյան իշխանությունների համոզմամբ՝ Ֆրանսիան խտրական հարկային քաղաքականություն է վարում ամերիկյան ընկերությունների դեմ: Աղբյուրը հիշեցնում է, որ նախօրեին Թրամփը հայտարարել էր Բրազիլիայից և Արգենտինայից պողպատի և ալյումինի ներկրման մաքսատուրքերը վերականգնելու որոշման մասին: