ԱԺ ԲՀԿ խմբակցության պատգամավոր Իվետա Տոնոյանը խորհրդարանական ճեպազրույցների ժամանակ այսօր անդրադարձավ հարցին, թե ԲՀԿ խմբակցությունում կա՞ն պատգամավորներ, ովքեր սերտաճած են քրեական հեղինակությունների հետ և այդ պատճառո՞վ են իրենք դեմ քվեարկել քրեական ենթամշակույթը քրեականացնող նախագծին:
«Ես կարող եմ ևս մեկ անգամ վերահաստատել Բարգավաճ Հայաստան կուսակցության դիրքորոշումը, թեպետ շուրջ երկու շաբաթ մենք պարբերաբար մեր դիրքորոշումը ներակայացրել ենք: Հարցն ամենևին չի վերաբերում անձերին կամ, ինչպես ընդունված է ասել, օրենքով գողերին: Ցանկացած հանցանք պետք է պատժելի լինի, և սրանում երկրորդ կարծիք լինել չի կարող: Սակայն այս դեպքում, երբ օրենքը ծայրից ծայր խոցելի է, որ կա իրավական որոշակիության հետ կապված խնդիր, աստիճանակարգութան հետ կապված և այլն, այդ պատճառով ԲՀԿ-ն դեմ է քվեարկել այս նախագծին: Եվ որևէ առնչություններ այդ աշխարհի հետ, կամ առանձին պատգամավորների առանձին մտքերից մեջբերումներ, դրանք բացառապես հեքիաթասացության ժանրից են, ոչ ավելին»,- ասաց Իվետա Տոնոյանը:
