ԿԳՄՍ նախարար Արայիկ Հարությունյանի հրաժարականի պահանջով, այսօր հերթական անգամ ԵՊՀ ուսանողները հայտարարել են դասադուլ եւ իրականացնում են բողոքի ակցիա։ ԿԳՄՍ նախարարն ինչու է ուզում կրճատել մեր լեզվի ժամերը, ինչու է ուզում մեկուսացնել լեզուն, գրականությունը, պատմությունը: Երեւանի փողոցներով բողոքի երթ իրականացնելիս հայտարարեց ուսանողներից Գեւորգ Գյուլումյանը, ով ակցիայի կազմակերպիչներից է:
«Եթե մի բանի հետ ինքը կապ չունի, դա չի նշանակում, որ դա պիտանի չէ մեզ: Եթե ինքը չի հասկանում, թե ինչ է մշակույթը, դա չի նշանակում, որ մշակույթ գոյություն չունի»,-ասաց նա:
Ակցիայի մեկ այլ մասնակից էլ հայտարարեց. «Բացի լպիրշ լեքսիկոնից, փողոցային բառապաշար օգտագործելուց ուրիշ ոչինչ չունի ասելու հայությանը: Իր ուսանողներին անդաստիարակ համարողը, եւ համասեռամոլին իր ընդունարանում ընդունողը եւ բավարարված համարողը պետք է անբավարարված հեռանա»:
Նրանք նշեցին, որ նախարար Արայիկ Հարությունյանը հովանավորում է սատանիզմը:
Ուսանողները, որոնք անցնում են տարբեր բուհերի շենքերի մոտով, վանկարկում են «ուսանող միացիր», «դասադուլ»:
Նշենք, որ դասադուլ են հայտարարել ԵՊՀ Հայ բանասիրության եւ պատմության ֆակուլտետների ուսանողները:
Հիշեցնենք, որ ուսանողները դեմ են նախարարության նախաձեռնած «Բարձրագույն կրթության մասին» օրինագծին, որով առաջարկվում է բուհերում ոչ մասնագիտական ֆակուլտետներում հայեցողական դարձնել այժմ պարտադիր համարվող՝ «Հայոց լեզու», «Հայ գրականություն» եւ «Հայոց պատմություն» առարկաների դասավանդումը: Նրանք նոյեմբերի 6-ից դասադուլ են հայտարարել՝ պահանջելով օրինագծում վերանայել վիճահարույց այս կետը նաեւ ստորագրահավաք են սկսել, որին միացել են նաեւ ուսանողներ մարզային բուհերից:
Դաշնակցության երիտասարդական միության ներկայացուցիչները երկու օրվա դադարից հետո այսօր վերսկսել են նոյեմբերի 6-ին հայտարարված նստացույցը Արայիկ Հարությունյանի հրաժարականի պահանջով:
Արայիկ Հարությունյանը հայտարարել է, որ չի պատրաստվում հրաժարական ներկայացնել:
