Մամուլի այն «լուսաբանումները», թե Սամվել Բաբայանը պատրաստվում է փակել միջպետական ճանապարհներ, չեն համապատասխանում իրականությանը, զուտ այն պատճառով, որ դա դեմ է Սամվել Բաբայանի պետականամետ դիրքորոշմանը եւ առհասարակ դեմ է առողջ հասարակարգի ձեւավորման նրա մոտեցումներին։ Այս մասին հայտարարություն է տարածել Սամվել Բաբայանի գրասենյակը: Հայտարարությունում նաեւ ասվում է. «Սամվել Բաբայանը շատ լավ գիտի Արցախի ազատագրման գինը եւ նրա պահպանման բոլոր երաշխիքները։ Արցախի ապակայունացմանը գնացող գործընթացները զուգահեռներ չեն կարող ունենալ Բաբայանի քաղաքական պատկերացումների հետ։ Ուստի կոչ ենք անում անձին արատավորող եւ նրա գաղափարներին դեմ գնացող այս մակարդակի հոդվածները գրելուց առաջ, ճշտել տվյալ կողմի դիրքորոշումը։ Եթե կա այսպիսի տեղեկություն, ապա կարող եք դիմել միմիայն այն համախմբված հակաբաբայանական խմբին, որ այսօր գործում է Արցախում՝ իշխանական բուրգին իր բոլոր մետաստազներով ու ածանցյալներով։ Սա ԱՀ իշխանության տարածած ապատեղեկատվությունն է, որով փորձում են բխեցնել հետագա իրենց անելիքները։ Իշխանությունը զավթած Բակո Սահակյանը, որը երրորդ անգամ առաջադրվեց նախագահի պաշտոնում ապօրինի, հակասահմանադրական ճանապարհով, որովհետեւ ըստ ԱՀ սահմանադրության. Նույն անձը չի կարող ավելի քան երկու անգամ ընտրվել Հանրապետության նախագահի պաշտոնում(ԱՀ սահմանադրություն գլուխ 4, հոդված 88, կետ 2), այսօր ուժային կառույցների միջոցով փորձում է ահաբեկել մարդկանց։ Չի ստացվելու, պայթել են այն վախի ձեւաչափերը, որոնք տարիներ շարունակ կիրառվել են Արցախում։ Այսօր հեռավոր 2000-ականներին վերադառնալը ուղղակի անիմաստ է եւ անկարելի։ Այսօր մարդիկ շատ լավ գիտակցում են, թե ուր են գնում եւ ինչի համար։ Իսկ օրենքով սահմանված հանրահավաքներ (ԱՀ սահմանադրություն գլուխ 2, հոդված 44) տեղի կունենան անպայման անօրեն իշխանություններին օր առաջ պետական կառավարումից հեռացնելու եւ օրինական ընտրություններ անցկացնելու համար, որտեղ ժողովուրդը կարտահայտի իր կամքը։ Սահմանադրական կարգը Արցախում վաղուց տապալված է եւ նոր տապալողներ, առավել եւս Սամվել Բաբայանի անձի շուրջ չփորձեք փնտրել։ Մենք աշխատելու ենք միայն օրենքով սահմանված կարգով, ապօրինությունները ձեզ են բնորոշ։ Կոչ ենք անում չխառնել դեմքերն ու դերերը»: