ՀՀ ԱԺ արտաքին հարաբերությունների մշտական հանձնաժողովի անդամներ Անուշ Բեղլոյանը, Գոռ Գեւորգյանը եւ ՀՀ ԱԺ եվրոպական ինտեգրման հարցերի մշտական հանձնաժողովի անդամ Սոնա Ղազարյանը հունիսի 24-ին հանդիպել են Վիետնամի Սոցիալիստական Հանրապետության Ազգային ժողովի արտաքին կոմիտեի նախագահի տեղակալ Նյուգեն Ման Թիենի գլխավորած պատվիրակության հետ:
Ողջունելով հյուրերին ՀՀ Ազգային ժողովում՝ Անուշ Բեղլոյանը նշել է, որ Վիետնամը մեր երկրի համար կարեւոր գործընկեր է, եւ այս այցը լավ հնարավորություն է քննարկելու երկու երկրների միջեւ համագործակցության հեռանկարները: Պատգամավորն ընդգծել է Հայաստանի` արեւմուտքի եւ արեւելքի միջեւ գտնվելու աշխարհագրական դիրքը եւ նշել, որ դա դրական ազդեցություն կարող է ունենալ առեւտրային ու տրանսպորտային ուղիների տեսանկյունից փոխգործակցության զարգացման գործում:
Անուշ Բեղլոյանը տեղեկացրել է, որ ՀՀ ԱԺ-ն վավերացրել է Հայաստանի եւ Կորեայի կառավարությունների միջեւ ստորագրված ներդրումների խրախուսման եւ փոխադարձ պաշտպանության համաձայնագիրը, որը հեշտացված առեւտրային տարրեր է ենթադրում ավիացիայի եւ ռազմարդյունաբերության ոլորտներում: Ըստ պատգամավորի՝ հաշվի առնելով Վիետնամի եւ Կորեայի Հանրապետությունների միջեւ եղած բարիդրացիական հարաբերությունները, երկկողմ համագործակցության հեռանկարներ են բացվում նաեւ այս համաձայնագրի շրջանակում:
Վիետնամի Ազգային ժողովի արտաքին հարաբերությունների կոմիտեի նախագահի տեղակալը ներկայացրել է իր երկրի տնտեսական ցուցանիշները, կարեւորել Հայաստանի հետ տարբեր ոլորտներում համագործակցության զարգացումը: Այս համատեքստում նա հատկապես ընդգծել է զբոսաշրջության զարգացման ու օդային ուղիղ չվերթների իրականացման հարցերը:
00:00:00
