Մի խումբ քաղաքացիներ այսօր բողոքի ակցիա են իրականացրել Երևանում Ռուսաստանի դեսպանատան մոտ:
Բողոքի ձայն են բարձրացնում Գյումրիում տեղակայված ռուսական բազայում ոչ կանոնադրական հարաբերությունների, ՀՀ քաղաքացիների անվտանգությանը սպառնալիք դարձած ռազմաբազայի դեմ: Ցուցարարները հայտարարություն հնչեցրին՝ նշելով, որ ռուսական բազան սպառնալիք է դարձել Հայաստանի ինքնիշխանությանն ու քաղաքացիների անվտանգությանը:
Ակցիայի մասնակիցներից Նարինե Մկրտչյանը նշեց, որ սպասեցին, Ռուսաստանի դեսպանությունից ոչ ոք չիջավ: «Մեզ առաջարկվեց այն արկղը գցել: Սա խոսում է նաև այն մասին, որ ՌԴ-ն պատրաստ չէ լսել Հայաստանի քաղաքացիների պահանջները, և Մոսկվան վստահ է, որ Հայաստանի քաղաքացիների հետ կարող է վարվել այնպես, ինչպես Կալինինգրադի մարզի քաղաքացիների հետ: Հայաստանը չի եղել եւ չի դառնա Կալինինգրադի մարզ, մենք անկախ պետություն ենք»:
Մկրտչյանի խոսքով, Ռուսաստանը պետք է պահպանի Հայաստանի Հանրապետության օրենքները, կանոնադրական հարաբերություններ հաստատի բազայում, հարգի իրենց իսկ կողմից ստորագրված պայմանագրերը և մի շարք այլ պահանջներ: «Մենք հասկանում ենք, որ Ռուսաստանը չվերանայի իր քաղաքականությունը, Հայաստանում կարող է ավելի արմատական դրվի այդ հարցը: Ամեն ինչ կախված է նրանից, թե ինչ հետևություններ է անելու Մոսկվան», – ասել է նա:
