Գերմանացի ոստիկանները ահաբեկչություն նախապատրաստելու կասկածանքով Բեռլինում ձերբակալել են 31-ամյա ռուս քաղաքացի Մագոմեդ Ալի Ց.-ին: BBC-ի հաղորդմամբ՝ այս մասին ասվում է Գերմանիայի դաշնային դատախազության կայքում:
«Մեղադրյալը կասկածվում է նրանում, որ գործելով Ֆրանսիայում ձերբակալված Կլեմենտ Բ.-ի հետ միասին՝ ծանր, պետությանը սպառնացող հանցագործություն էր նախապատրաստում, ինչպես նաև պայթուցիկի կիրառմամբ ահաբեկչություն», - ասվում է դատախազության հայտարարության մեջ:
Կասկածյալի տանը խուզարկության ժամանակ պայթուցիկ նյութեր են հայտնաբերվել, որոնք, ինչպես ենթադրում է հետաքննությունը, վերջինս պատրաստվում էր օգտագործել ռումբի պատրաստման համար:
Ենթադրվում է, որ ՌԴ քաղաքացին պատրաստվում էր պայթյուն իրականացնել Գերմանիայի տարածքում «հնարավորինս շատ մարդկանց սպանելու կամ վիրավորելու» նպատակով:
Գերատեսչությունը չի մասնավորեցնում, թե որտեղ էր նախատեսվում իրականացնել պայթյունը:
00:00:00
