Չեչնիայի ղեկավար Ռամզան Կադիրովը կարծում է, որ բրիտանական Սոլսբերիի միջադեպը պարզապես առիթ էր ԱՄՆ-ի կողմից ՌԴ-ի դեմ նոր պատժամիջոցների հայտարարման համար, իսկ պատժամիջոցների փաթեթը վաղուց էր մշակվել եւ սպասում էր իր ժամին, հաղորդում է «ՌԻԱ Նովոստին»: «Եթե պատմության մեջ չլինեին Սկրիպալները, ուրիշ պատճառ կգտնեին, եթե ոչ մի պատճառ չգտնեին, կմեղադրեին, որ առիթ չենք տալիս»,- Telegram-ի իր ալիքում գրել է Կադիրովը: «Ոչ մի կասկած չկա, որ ԱՄՆ-ի ծրագրերը ձախողվելու են: Բայց հնարավոր է, մինչեւ ԱՄՆ-ի ղեկավարությունը, նախագահը գիտակցեն դա, տարիներ անցնեն: Ուստի ոչ ոք չպետք է իրեն մխիթարի, որ վաղը պատժամիջոցները կարող են չեղարկվել, Վաշինգթոնի հետ հարաբերությունները կարող են արմատապես փոխվել»,-հավելել է նա: