Երեւանի պետական համալսարանի ռեկտոր Արամ Սիմոնյանի հրաժարականը շարունակում է մնալ «ԵՊՀ ռեստարտ» նախաձեռնության օրակարգում։ Նախաձեռնության ներկայացուցիչ Դավիթ Պետրոսյանը NEWS.am–ի հետ զրույցում ասաց, որ իրավական կարգավորման հարցեր կան, որոնք կրթության եւ գիտության նախարարության տիրույթում են։ Անկախ ԿԳՆ գործառույթների իրագործման ժամկետներից՝ ուսանողները պատրաստ են ամեն վայրկյան ոտքի կանգնել հանուն արդարության հաստատման։
«Ռեկտորի հրաժարականը ինքնանպատակ չէ։ Ռեկտորի հրաժարականի նպատակը համալսարանում համակարգային փոփոխություններն են։ Հոգաբարձուների խորհրդի հարցն է օրակարգային, Սերժ Սարգսյանը մինչեւ հիմա հոգաբարձուների խորհրդի նախագահն է, ու համալսարանը պարալիզացված վիճակում է։ Հոգաբարձուների խորհրդի հարցի լուծմամբ պայմանավորած է ռեկտորի հրաժարականի հարցը։ Այս հարցի լուծման բանալին գտնվում է կրթության նախարարության ձեռքում»,–ասաց Դավիթ Պետրոսյանը՝ նշելով, որ հարցն ավելի շատ իրավական ձեւակերպումների հակասությունների տիրույթում է։
Ըստ նրա, Սերժ Սարգսյանը, Վիգեն Սարգսյանը, Հրանուշ Հակոբյանը հոգաբարձուների խորհրդում են ընդգրկվել ի պաշտոնե եւ պաշտոնները լքելուց հետո պետք է հրաժարական տային նաեւ հոգաբարձուների խորհրդից։
«Մենք սպասում ենք նախարարության արձագանքին, եթե կոնկրետ նախարարությունը հստակեցնի իր դիրքորոշումը, մենք կունենանք հստակ քայլերի ծրագիր։ Հիմա մենք ուսանողական անկախ տարածք ձեւավորելով ենք զբաղված, որ անկախ քաղաքական տեղաշարժերից՝ ուսանողները ունենան իրենց անկախ տարածքը, որը ավելի շատ նման է արհմիության։ Ուսանողները անկախ քաղաքական կոնյուկտուրայից՝ պետք է իրավունք ունենան բարձրաձայնել իրենց խնդիրների մասին։ Սա հեղափոխության կողմից հռչակված արժեքների պահպանմանն է միտված»,-ասաց Դավիթ Պետրոսյանը:
Չնայած ուսանողները սպասում են նախարարության քայլերին, սակայն եթե հարկ լինի ոտքի կկանգնեն հանուն արդարության հաստատման. «Ուսանողությունը ամեն վայրկյան պատրաստ է ոտքի կանգնել ոչ միայն համալսարանում արդարության հաստատման համար, այլ ամբողջ երկրի տարածքում»։
00:00:00
