Վրաստանի ավտոճանապարհների դեպարտամենտի տեղեկատվությամբ՝ վատ եղանակի պատճառով երկրի մի շարք ավտոճանապարհային հատվածներում սահմանափակումներ են մտցվել, գրում է aliq.ge-ն:
Առատ ձյան պատճառով պետական նշանակության Գոդերձիի լեռնանցք-Բեշումի ավտոճանապարհին արգելված է բոլոր տեսակի ավտոտրանսպորտի երթևեկությունը։
Բացի այդ, ձյան և ցածր ջերմաստիճանի պատճառով սահմանափակումներ են գործում նաև միջազգային նշանակության Մցխեթա–Ստեփանծմինդա–Լարս ավտոճանապարհին։ Մասնավորապես, կմ93-կմ107 (Գուդաուրի-Կոբի) հատվածում ժամանակավորապես արգելված է կցորդով և կիսակցորդով ավտոտրանսպորտի երթևեկությունը, մինչդեռ մարդատար և մնացած տեսակի ավտոտրանսպորտի համար տեղաշարժն ազատ է։
Դեպարտամենտի տեղեկատվությամբ՝ նշված մայրուղու մնացած հատվածներում ճանապարհային երթևեկությունն անխափան է իրականացվում։
