ՀՀ էկոնոմիկայի նախարար, ՓՄՁ զարգացման ենթախորհրդի նախագահ Գևորգ Պապոյանի գլխավորությամբ սեպտեմբերի 23-ին կայացել է ենթախորհրդի հերթական նիստը։ Այդ մասին հայտնում են ՀՀ էկոնոմիկայի նախարարությունից:
Նիստի սկզբում ներկայացվել է նախկինում քննարկված հարցերի կատարման ընթացքը։
Այնուհետև քննարկվել են առևտրային ցանցերի կողմից մատակարարներին վճարումների ուշացումները կանխելուն ուղղված երկու առաջարկ՝ վճարման ժամկետների պահպանման վերաբերյալ պարբերական հաշվետվողականության համակարգի ներդրումը և պատասխանատվության համար հիմք հանդիսացող կետանցի ժամկետային ու գումարային շեմերի վերանայումը։
Նիստի ընթացքում Էկոնոմիկայի նախարարության կողմից ենթախորհրդի անդամների քննարկմանը ներկայացվել են նաև տեղական արտադրանքի սպառման և առաջխաղացման հնարավորությունների ընդլայնմանն ուղղված առաջարկներ։ Վերջիններիս նպատակն է աջակցել տեղական ՓՄՁ-ներին խոշոր առևտրային ցանցեր մուտք գործելու հարցում, մեծացնել հայրենական արտադրանքի տեսանելիությունն ու նպաստել դրա նկատմամբ երկարաժամկետ պահանջարկի ամրապնդմանը։
Փոխվարչապետի գլխավորությամբ գործող ՓՄՁ զարգացման խորհրդին մասնագիտական աջակցություն է տրամադրում ՎԶԵԲ-ի Հայաստանի ներդրումային խորհուրդը՝ Միացյալ Թագավորության կառավարության Լավ կառավարման հիմնադրամի աջակցությամբ։
