ԱՄՆ Կանզաս նահանգից հանրապետական սենատոր Ռոջեր Մարշալը NBC News-ին տված հարցազրույցում հայտարարել է, որ, իր կարծիքով, ԱՄՆ-ի և Իրանի միջև պատերազմի հիմնական փուլն ավարտվել է, իսկ այն, ինչ տեղի է ունենում հիմա, «մարտական գործողությունների ավարտման գործողություն է»։

«Հիմնական պատերազմն արդեն ավարտվել է, և համարեք, որ հիմա սա գրեթե մարտական գործողությունների ավարտման գործողություն է։ Եթե նրանք հարվածեն մեզ, մենք պետք է տասնապատիկ պատասխանենք նրանց», — հայտարարել է Մարշալը Meet the Press հաղորդման եթերում։

Մարշալը նաև մատնանշել է այս շաբաթ ԱՄՆ պետքարտուղար Մարկո Ռուբիոյի միջնորդությամբ Իսրայելի և Լիբանանի միջև ձեռք բերված շրջանակային խաղաղության համաձայնագիրը՝ այն անվանելով վկայություն այն բանի, որ Վաշինգտոնը մոտենում է իր նպատակներին հասնելուն․ «Իրանի մոտ ոչ մի միջուկային զենք, ոչ մի անվերջ պատերազմ, բենզինի և մթերքի գների նվազում»։

Պատասխանելով այն հարցին, թե արդյոք պատերազմն իսկապես ավարտվել է, սենատորն ասել է. «Ես խնդրում եմ ամերիկացիներին համբերատար լինել։ Այժմ գործում է լիցքաթափումը, գործում է հրադադարը։ Այո՛, նրանք խախտել են հրադադարը, և մենք պետք է դրան պատասխանենք»։

Ավելի վաղ ԱՄՆ նախագահ Դոնալդ Թրամփը Truth Social սոցիալական ցանցում հայտարարել էր, որ ամերիկյան ավիացիան հարվածներ է հասցրել իրանական հրթիռների և անօդաչուների պահեստներին, ինչպես նաև առափնյա ռադիոլոկացիոն օբյեկտներին՝ հրադադարի համաձայնագրի հերթական խախտման համար։

Իրանի ԻՀՊԿ-ն, իր հերթին, հայտնել է, որ գիշերը բալիստիկ հրթիռներով և անօդաչու սարքերով հարվածներ է հասցրել ամերիկյան բանակի ութ օբյեկտների, այդ թվում՝ Քուվեյթում գտնվող Ալի ալ-Սալեմ ավիաբազային և Բահրեյնի Սալման նավահանգստում ԱՄՆ ռազմածովային ուժերի Հինգերորդ նավատորմի օբյեկտներին։