ՆԱՏՕ գլխավոր քարտուղար Մարկ Ռյութեն հայտնել է, որ դաշինքը «պատրաստ է պաշտպանել իր տարածքի յուրաքանչյուր թիզն» այն բանից հետո, երբ ռուսական անօդաչու թռչող սարքը Ռումինիայում ընկել է բնակելի տան վրա, գրել է The Guardian-ը։
Միջադեպը տեղի է ունեցել Գալաց քաղաքում՝ Ուկրաինայի սահմանից ոչ հեռու։ Ռումինիայի իշխանությունների տվյալներով՝ անօդաչու թռչող սարքը երկրի օդային տարածքում հայտնաբերվել է ռադարների կողմից, որից հետո բախվել է բազմաբնակարան շենքի տանիքին, որի հետևանքով հրդեհ է բռնկվել, տուժել է երկու մարդ, իսկ բնակիչների մի մասին ստիպված են եղել տարհանել։
Ռումինիայի նախագահ Նիկուշոր Դանը հայտարարել է, որ Բուխարեստը թույլ չի տա պատերազմը տեղափոխել երկրի տարածք։ Նա հանձնարարել է պատրաստել Մոսկվայի նկատմամբ միջոցառումների փաթեթ՝ «իրավիճակի լրջությանը համաչափ»։
Ռումինիայի արտաքին գործերի նախարարությունը տեղի ունեցածն անվանել է «կոպիտ և անպատասխանատու սրում» և «միջազգային իրավունքի լուրջ խախտում»։ Ռումինիայի իշխանությունները նաև դիմել են ՆԱՏՕ-ին՝ խնդրելով արագացնել անօդաչու թռչող սարքերից պաշտպանության համակարգերի մատակարարումները։
Միջադեպից հետո ռումինական զինվորականները օդ են բարձրացրել երկու F-16 կործանիչ և մեկ ուղղաթիռ՝ թիրախները խոցելու թույլտվությամբ։ Սահմանամերձ շրջաններում հայտարարվել է օդային տագնապ։
Եվրահանձնաժողովի նախագահ Ուրսուլա ֆոն դեր Լյայենը հայտնել է, որ Ռուսաստանի գործողություններն «անցել են ևս մեկ կարմիր գիծ», և հայտնել է իր լիակատար աջակցությունը Ռումինիային։
Ֆրանսիայի արտաքին գործերի նախարար Ժան-Նոել Բարոն նույնպես դատապարտել է տեղի ունեցածը՝ ընդգծելով, որ անօդաչու թռչող սարքը հարվածել է մի երկրի տարածքին, որը Եվրամիության և ՆԱՏՕ անդամ է։
Ուկրաինայի ԱԳ նախարար Անդրեյ Սիբիգան հայտնել է, որ միջադեպը կրկին ցույց տվեց այն սպառնալիքը, որը Ռուսաստանի գործողությունները ներկայացնում են ողջ Սևծովյան տարածաշրջանի և Եվրոպայի համար։
Ուրբաթ Նիկուշոր Դանը հրավիրել է Ռումինիայի ազգային պաշտպանության բարձրագույն խորհրդի արտահերթ նիստ, իսկ Ռուսաստանի դեսպանը կանչվել է երկրի արտաքին գործերի նախարարություն։ Ռումինիայի իշխանությունները նաև հայտնել են եվրոպական մակարդակով հետագա քայլերի նախապատրաստման մասին, ներառյալ Ռուսաստանի դեմ նոր պատժամիջոցների քննարկումը։
