Եվրամիությունը շուտով կվերսկսի Ադրբեջանի հետ համագործակցության մասին նոր երկկողմ համաձայնագրի շուրջ բանակցությունները։ Այս մասին հայտարարել է եվրոպական դիվանագիտության ղեկավար Կայա Կալասը, տեղեկացնում է ՌԻԱ Նովոստի-ն։
Նշվում է, որ մամուլի ասուլիսի ժամանակ նա, մասնավորապես, ասել է. «Ադրբեջանը շարունակում է կարևոր գործընկեր մնալ էներգետիկայի և փոխկապակցվածության ոլորտներում։ Մենք ցանկանում ենք խորացնել մեր կապերը և շուտով կվերսկսենք համագործակցության մասին նոր երկկողմ համաձայնագրի շուրջ բանակցությունները»։
Ըստ աղբյուրի՝ Ադրբեջանի և ԵՄ-ի միջև ռազմավարական գործընկերության մասին համաձայնագիրը չորս բաժնից է բաղկացած։ Բանակցությունները մեկնարկել են 2017 թվականի փետրվարի 7-ին։ Այս պահին բաց են մնում որոշ հարցեր՝ կապված առևտրատնտեսական մասի հետ։ Ավելի վաղ հայտարարվել էր, որ կողմերը համաձայնության են եկել համաձայնագրի տեքստի 90 տոկոսի շուրջ։
