Շաբաթ օրը Պրահայում տասնյակ հազարավոր մարդիկ բողոքի ցույցի են դուրս եկել վարչապետ Անդրեյ Բաբիշի գլխավորած նոր չեխական կառավարության քաղաքականության եւ ծրագրերի դեմ, հաղորդել է Associated Press-ը։
Ողջ Չեխիայի Հանրապետությունից ցուցարարներ են մասնակցել Լետնա այգում տեղի ունեցած խաղաղ ցույցին, որտեղ 1989թ․ տեղի են ունեցել զանգվածային հանրահավաքներ, որոնք զգալիորեն նպաստել են կոմունիզմի անկմանը։
Նրանք եկել էին արտահայտելու իրենց մտահոգությունը, որ միլիարդատեր Բաբիշն ու նրա կոալիցիոն կաբինետը սպառնալիք են ներկայացնում ժողովրդավարության համար՝ երկիրը հեռու պահելով Ուկրաինային աջակցելուց եւ ուղղորդելով դեպի ավտոկրատիա։ Ամբոխը, որը կազմակերպիչները գնահատել են 200 000 մարդ, ծածանել է չեխական դրոշներ։
Բաբիշը Չեխիայի Հանրապետությունում վերադարձավ իշխանության այն բանից հետո, երբ նրա ANO շարժումը խոշոր հաղթանակ տարավ հոկտեմբերյան ընտրություններում եւ կոալիցիա կազմեց երկու փոքր քաղաքական խմբերի՝ հակամիգրացիոն «Ազատություն եւ ուղիղ ժողովրդավարություն» կուսակցության եւ ծայրահեղ աջ «Վարորդներն իրենց համար» շարժման հետ։ Իր նոր դաշինքի միջոցով այն խմբերի հետ, որոնց որոշ հայացքներ համարվում են ծայրահեղական, կառավարությունը սկսել է երկրի արտաքին եւ ներքին քաղաքականության էական վերանայում։
Բաբիշը դեմ է արտահայտվել շրջակա միջավայրի եւ միգրացիայի վերաբերյալ Եվրամիության մի քանի հիմնական քաղաքականություններին եւ մերժել է ցանկացած ֆինանսական օգնություն Ուկրաինային կամ ԵՄ-ի կողմից Կիեւին տրամադրվող վարկային երաշխիքները՝ միանալով Հունգարիայի վարչապետ Վիկտոր Օրբանի եւ Սլովակիայի վարչապետ Ռոբերտ Ֆիցոյի շարքին։
Նոր կառավարությունը պատրաստում է օրինագիծ, որը, քննադատների կարծիքով, ոգեշնչված է Ռուսաստանի «Օտարերկրյա գործակալների մասին» օրենքով, որը կպահանջի, որ ոչ կառավարական կազմակերպությունները եւ անհատները, որոնք զբաղվում են անորոշ սահմանված քաղաքական գործունեությամբ եւ ստանում են արտաքին օգնություն, գրանցվեն, հակառակ դեպքում կենթարկվեն մեծ տուգանքների։
Սպասվում են բողոքի նոր ցույցեր։
