Իրանի հարավում գտնվող դպրոցի վրա հարձակումն իրականացվել է Արաբական Միացյալ Էմիրություններում տեղակայված ամերիկյան «Ալ-Դաֆրա» ավիաբազայից: Այս մասին տեղեկացնում է իրանական Fars գործակալությունը՝ հղում անելով Իսլամական հեղափոխության պահապանների կորպուսի (ԻՀՊԿ) հայտարարությանը:
Նշվում է, որ հարձակման ընթացքում հարյուրավոր երեխաներ են զոհվել
Փետրվարի 28-ին այդ ռազմակայանից հարված էր հասցվել բալիստիկ հրթիռներով։ Իրանի ԱԳՆ-ն ավելի վաղ հայտարարել էր, որ դպրոցին հարվածել են երկու հրթիռով, և հարվածը եղել է կանխամտածված:
Իսկ այսօր իրանական ուժերը կրկին հարձակվել են «Ալ-Դաֆրա» ավիաբազայի վրա: Իրանի կողմից արձակված և նախապես իրանական ԶԼՄ-ներով ցուցադրված հրթիռներից մեկի վրա գրված է. «Ի հիշատակ Մինաբի դպրոցի աշակերտուհիների»:
«Թիրախը դարձել է ԱՄԷ-ում գտնվող «Ալ-Դաֆրա» ավիաբազան, որն օգտագործվում է տարածաշրջանում ամերիկյան ուժերի կողմից: «Շաջարե Թայեբե» դպրոցի վրա հանցավոր հարձակումը, որի հետևանքով զոհվել է 165 աշակերտուհի, իրականացվել է հենց այդ բազայից»,-ասված է ԻՀՊԿ-ի հայտարարության մեջ:
Ավելի վաղ իրանական իշխանությունները զոհերի թվի վերաբերյալ այլ տվյալներ էին հայտնել: Մասնավորապես, Իրանի ԱԳ նախարար Աբաս Արաղչին հայտնել էր 171 զոհի մասին:
