Ադրբեջանի Խաթայի շրջանային դատարանը երկարաձգել է Բաքվում ձերբակալված մի խումբ Ռուսաստանի քաղաքացիների կալանքը, հաղորդել են Ադրբեջանական լրատվամիջոցները։

Փաստաբանը հայտնել է, որ այսօրվա նիստում Ռուսաստանի յուրաքանչյուր քաղաքացու կալանքը երկարաձգվել է երեքական ամսով։ Նա հայտարարել է նաև Ռուսաստանի քաղաքացու վերաբերյալ դատարանի որոշումը բողոքարկելու իր մտադրությունը։

Ռուսաստանի քաղաքացիներին ձերբակալել են Ադրբեջանի Ներքին գործերի նախարարության «գործողության» ընթացքում, որը կապված է «Իրանից թմրանյութերի տարանցման, դրանց անօրինական շրջանառության և կիբեռհանցագործության» հետ։ Անցյալ տարվա հուլիսի 1-ին Սաբայիլի շրջանային դատարանը նրանց համար չորսամսյա նախնական կալանք էր նշանակել։ Անցյալ տարվա հոկտեմբերի 28-ին Խաթայի շրջանային դատարանը նրանց կալանքը երկարաձգել էր երեք ամսով։

Ինչպես հաղորդում է ТАСС-ը, 2025 թվականի դեկտեմբերին Բաքվում ռուս-ադրբեջանական քաղաքական խորհրդակցությունների ժամանակ փոխարտգործնախարար Միխայիլ Գալուզինը ադրբեջանական կողմին ընդգծել է Բաքվում ձերբակալված 11 ռուսների արագ ազատ արձակման կարևորությունը։