Լաբորատորիան ստեղծվել է՝ ուսանողներին գործնականորեն ծանոթացնելու հեռահաղորդակցության ոլորտի ժամանակակից տեխնոլոգիաներին, ուսումնասիրելու դրանց կառուցվածքն ու սկզբունքները, ինչպես նաև փոխանցելու այնպիսի գիտելիքներ և հմտություններ, որոնք կօգնեն պատրաստ լինել աշխատել ոլորտում՝ հենց առաջին օրվանից։Պաշտոնական բացման ընթացքում իմ խոսքում նշել եմ, որ այս նախաձեռնությունը երկու կարևոր ուղերձ է փոխանցում՝ մասնավորպես․

Առաջինը՝ բովանդակության մասին է։

 

Սա խորքային բովանդակությամբ, տեխնոլոգիական նորարար սարքերով հագեցած լաբորատորիա է։ Մենք կահավորել ենք ֆիզիկապես փոքր, բայց խորը բովանդակությամբ լաբորատորիա։ Հաճախ լինում է հակառակը՝ մեծ տարածքներ՝ առանց բովանդակության։ Այսօր խոսքը բացառապես բովանդակության մասին է՝ այնպիսի միջավայրի, որտեղ ուսանողը ստանում է գործնական կրթություն և կարող է դառնալ մասնագետ, որը կսկսի աշխատել առաջին իսկ օրվանից, այլ ոչ թե աշխատանքի առաջին օրվանից կմտածի սովորելու մասին։

 

Երկրորդը՝ կարևոր ինստիտուցիոնալ համագործակցության մասին է։

 

Այս լաբորատորիան փայլուն օրինակ է պետություն–մասնավոր հատված–կրթական կառույց եռակողմ արդյունավետ համագործակցության։ Հանրային ծառայությունները կարգավորող հանձնաժողովի աջակցությամբ VIVA ընկերությունն ու Պոլիտեխնիկական համալսարանը խորացրին համագործակցությունը՝ միավորելով ռեսուրսներն ու փորձը՝ կրթական, հետազոտական և մասնագիտական զարգացման նպատակներով։

Լաբորատորիայի հնարավորությունները և նպատակները՝

ծանոթանալ բջջային ցանցի կառուցվածքին,

ուսումնասիրել ցանցի հիմնական հանգույցները և դրանց գործառույթները,

ճանաչել ոլորտում կիրառվող տեխնոլոգիաներն ու միջազգային ստանդարտները,

աշխատել նորագույն սարքավորումներով և ձեռք բերել գործնական գիտելիքներ,

տիրապետել այն ծրագրերին, որոնք կիրառվում են միջազգային հեռահաղորդակցության համակարգերում,

անցկացնել հետաքրքիր, ինտերակտիվ և հագեցած դասընթացներ։

 

Շնորհակալություն Հանրային ծառայությունները կարգավորող հանձնաժողովին և VIVA ընկերությանը՝ այս նախաձեռնությանը աջակցելու և այն մեր համալսարանում իրականություն դարձնելու համար։