Իրանի արտաքին գործերի նախարարության խոսնակ Էսմայիլ Բաղային մամուլի ասուլիսում հայտարարեց, որ Թեհրանն աջակցում է Ադրբեջանի և Հայաստանի Հանրապետության միջև վերջերս կնքված համաձայնագրին: Ընդգծելով Իրանի սկզբունքային դիրքորոշումը վեճերի խաղաղ կարգավորման հարցում, Բաղային անդրադարձավ Իրանի անվտանգության և աշխարհաքաղաքական մտահոգություններին Հարավային Կովկասի տարածաշրջանում, գրում է parstoday.ir-ը:
Անդրադառնալով Ադրբեջանի և Հայաստանի միջև համաձայնագրի ստորագրմանը՝ Իրանի արտաքին գործերի նախարարության խոսնակն այդ քայլն անվանել է երկու հարևան երկրների «ինքնիշխան որոշում» և ընդգծել է Իսլամական Հանրապետության աջակցությունն այդ կապակցությամբ։Բաղային նշել է, որ համաձայնագիրը կհարթի ճանապարհ տարածաշրջանում երկարատև անվտանգության և կայունության համար։Բաղային անդրադարձել է Թեհրանի ամենակարևոր մտահոգություններից մեկին՝ Հայաստանի հարավում դեպի Նախիջևան տարանցիկ ուղու ստեղծմանը։
Բաղային ընդգծել է.-«Չնայած մենք համաձայն ենք և աջակցում ենք տարածաշրջանի երկրների միջև շրջափակումների վերացմանը և հաղորդակցության ուղիների ստեղծմանը, կարծում ենք, որ նման ուղիները պետք է իրականացվեն՝ պահպանելով միջազգայնորեն ճանաչված սահմանները, հարգելով երկրների տարածքային ամբողջականությունը և առանց որևէ աշխարհաքաղաքական փոփոխությունների»։
Իրանցի պաշտոնյան նաև հայտնել է Թեհրանի լուրջ մտահոգությունը տարածաշրջանում օտարերկրյա ռազմական ուժերի հնարավոր ներկայության վերաբերյալ։Նշելով, որ այս հարցը բազմիցս բարձրացվել է հայ և ադրբեջանցի պաշտոնյաների հետ, նա ասել է, որ Իրանը տարածաշրջանում որևէ ռազմական ուժի տեղակայումը չի համարում կայունության և անվտանգության շահերից բխող։ Բաղայիի խոսքով՝ Թեհրանին վստահեցվել է, որ տարածաշրջանում օտարերկրյա ռազմական ուժեր չեն տեղակայվի, և խաղաղության համաձայնագրի հիմնական դրույթներից մեկը նաև ընդգծում է երկու երկրների ընդհանուր սահմանների երկայնքով երրորդ կողմի ռազմական ուժերի չտեղակայման հարցը։
Արտգործնախարարության խոսնակը եզրափակել է իր խոսքը՝ ընդգծելով, որ Իրանն ուշադիր հետևում է տարածաշրջանում տեղի ունեցող զարգացումներին և կապի մեջ է Հայաստանի և Ադրբեջանի իշխանությունների հետ՝ այս հարցում իր մտահոգությունները քննարկելու համար։
