Հանրապետության նախագահ Վահագն Խաչատուրյանն ընդունել է Լիտվայի նախկին նախագահ Դալիա Գրիբաուսկայտեի գլխավորած «Հայաստանի բարեկամներ» խմբի պատվիրակությանը:
Ողջունելով հյուրերին նախագահը նշել է. «Մենք մեծապես կարևորում ենք Ձեր խմբի գործունեությունը, և նաև գնահատում ենք այն աջակցությունը, որ ցուցաբերում եք մեզ: Ըստ էության, արդեն այս տարի մենք կարող ենք արձանագրել որոշակի հաջողություններ Եվրոպական միության հետ հարաբերություններում, որոնց շարքում կարող ենք նշել ապրիլի 5-ի հանդիպումները Բրյուսելում՝ ԵՄ, ԱՄՆ և Հայաստան ձևաչափով, որը նախադեպը չի ունեցել, և, իհարկե, կարևոր են ներկայումս էլ ընթացքող բովանդակային քննարկումները: Մեկ անգամ ևս շնորհակալություն եմ հայտնում Հայաստան այցելելու, «Երևանյան երկխոսություն» միջազգային համաժողովին մասնակցելու համար»:
Դալիա Գրիբաուսկայտեն շնորհակալություն է հայտնել ընդունելության համար և նշել, որ «Հայաստանի բարեկամներ» խումբը հնարավորության սահմաններում իր աջակցություննը կշարունակի ցուցաբերել Հայաստանին:
Հանդիպման ընթացքում քննարկվել են մուտքի արտոնագրերի ազատականացման նպատակով Եվրամիություն-Հայաստան երկխոսության մեկնարկի կարևորության վերաբերյալ հարցեր: Մտքեր են փոխանակվել քաղաքական, տնտեսական, մշակութային և այլ ոլորտներում ԵՄ-Հայաստան սերտ համագործակցության հետագա ընդլյանման հնարավորությունների շուրջ:
Զրույցի ընթացքում անդրադարձ է կատարվել ընդհանուր տարածաշրջանային իրողություններին և զարգացումներին: Այս համատեքստում Հանրապետության նախագահն ընդգծել է, որ Հայաստանի հաստատուն դիրքորոշումը տարածաշրջանում կայուն և տևական խաղաղության հասելն է:
