ԱԺ նախագահ Ալեն Սիմոնյանն ու ՔՊ խմբակցութան քարտուղար Արթուր Հովաննիսյանը քրեական ենթամշակույթի քարոզ պարունակող ֆիլմերի ու տեսալսողական հաղորդումների հեռարձակման ժամային սահմանափակում նախատեսող օրենքի նախագիծ են ներկայացրել:
Սիմոնյանն այսօր հայտարարեց, որ ԱԺ նախագահի պաշտոնը ստանձնելուց հետո առաջին անգամ է որպես համահեղինակ հանդես եկել:
«Այո, օրենքը բոլոր հարցերը չի լուծում ու չի էլ կարող լուծել, բայց քայլ պետք է անել»,- նշեց նա:
Սիմոնյանն ասաց նաև, թե ինչն է իրեն դրդել, որ նման նախագծի համահեղինակ դառնա:
«Վերջերս մի ֆիլմ աչքովս ընկավ, առաջին հինգ րոպեի ընթացքում այնպիսի բառապաշար ու բարքեր էր քարոզվում, որ ուղղակի չեմ ուզում անգամ այստեղ օրինակ բերել»,- ասաց ԱԺ նախագահը: Նա հիշատակեց Ալ Պաչինոյին, որ նա, լինելով ամենահայտնի ու ամենասիրված դերասանը, «Օսկար»-ի չի արժանացել, քանի որ նման բարքեր է տարածել:
«Չի կարելի թմրանյութը դիմացը լցրած մարդուն խրախուսել»,- նշեց Սիմոնյանը:
ԱԺ նախագահը կրկին խնդրեց չբերել իր թքելու օրինակը:
«Ես զգուշացրեցի, որ ես էլ կարող եմ օրինակներ բերել: Եթե այդքան պարկեշտ եք, եթե ձեր համար օրենքն այդքան կարևոր է, ձեր կուսակցի` Պողոս Պողոսյանի գլուխն այնքան էին հարվածել զուգարանակոնքին, որ մահացավ, ի՞նչ արեցիք, այդ նույն թիմի ներկայացուցչի հետ միացաք ու եկաք Ազգային ժողով: Ես ներողություն եմ խնդրել ու կրկին ներողություն եմ խնդրում, որովհետև դա անընդունելի եմ համարում, ես տեղ եմ տվել հույզերին, որի համար հետևություն եմ արել», - ընդգծեց Սիմոնյանը:
