«Նախագծով նախատեսվում է ժամանակավոր բնակվելու և կոմունալ ծախսերի աջակցության ծրագրի շրջանակներում հատկացնել ևս 950 մլն դրամ հոկտեմբերի վճարումների շարունակականությունն ապահովելու նպատակով»,-կառավարության այսօրվա նիստում հայտնեց աշխատանքի և սոցիալական հարցերի նախարար Նարեկ Մկրտչյանը՝ զեկուցելով բռնագաղթած արցախցիներին տրամադրվող աջակցության ծրագրի նոր հատկացումը:

Նա տեղեկացրեց, որ նախագծով նաև 420 մլն դրամ  հատկացում է կատարվում 100 հազար մինավագ սոցիալական աջակցության ծրագրին՝ մշակված և նույնականացված տվյալների վճարներն իրականացնելու համար:

«40+10 ծրագրից արդեն օգտվել է  73196 անձ, որոնցից 69199-ը ստացել են 40+10-հազարական դրամ, իսկ մնացածը միայն 10 հազար դրամ»,-հայտնեց Մկրտչյանը:

Նրա խոսքով՝ նոր որոշումով գումար կհատկացվի 19000 հազար մարդու և արդյունքում կստացվի, որ ծրագրից արդեն օգտվում է 90 հազարից ավել բռնագաղթած:

Նարեկ Մկրտչյանը նաև հայտնեց, որ  նախագծով 4200 բռնագաղթածի 100-հազարական դրամ կտրամադրվի, որոնք հիմնականում նույնականացված տվյալներով անչափահասներ են:

Ըստ նախարարի՝ նախագծով աջակցության ծրագրին ընդհանուր առմամբ հատկացվում է լրացուցիչ  1մլրդ 370 մլն դրամ:

Նիկոլ Փաշինյանի ճշտող հարցից հետո Նարեկ Մկրտչյանը  հայտնեց, որ 100-հազարական դրամների շահառու են ճանաչվել 104.200 արցախցի, որոնցից 100.600-ը վերջին բռնագաղթի ժամանակ են տեղափոխվել Հայաստան, իսկ մոտ 4000 արցախցի շրջափակման պատճառով նախկինում չէր կարողացել վերադառնալ Արցախի Հանրապետություն:

Նիկոլ Փաշինյանն էլ հանձնարարեց մինչև տարվա վերջ բռնագաղթածներին ոչ մի կանխիկով վճարում չարվի, այլ՝ բանկային քարտերով, որպեսզի գործադիրը հաշվետու լինի բյուջեի ծախսերի համար: