«Վանաձոր բժշկական կենտրոնում» 32-ամյա ծննդկանի մահվան գործով նախաքննությունն ավարտվել է:
Նույն ԲԿ-ի մանկաբարձագինեկոլոգիական բաժանմունքի ավագ մանկաբարձ-գինեկոլոգ Դավիթ Շահվերդյանն ամբաստանյալի աթոռին է հայտնվել:
Ըստ մեղադրանքի՝ Դավիթ Շահվերդյանը, որպես ավագ մանկաբարձ-գինեկոլոգ, նախկին մանկաբարձ-գինեկոլոգ, ներկայումս հանգուցյալ Արսեն Բալայանի հետ իրենց մասնագիտական պարտականությունների նկատմամբ անփույթ և անբարախիղճ վերաբերմունքի հետևանքով չեն իրականացրել Հռիփսիմե Նազլուխանյանի հետծննդաբերական բուժմիջոցառումները, որի հետևանքով անզգուշությամբ առաջացել է Հ.Նազլուխանյանի մահը:
Ավելի վաղ տեղեկացրել էինք, որ հղին, գտնվելով բժիշկների հսկողության ներքո, 21 օր անց` 2016 թվականի հոկտեմբերի 17-ին` ժամը 18:40-ին, ծննդաբերել է արական սեռի երեխա, որից հետո նրա ինքնազգացողությունը վատացել է, իսկ հոկտեմբերի 18-ին՝ ժամը 01:40-ին, կինը նույն բաժանմունքում մահացել է:
Դեպքի առթիվ հարուցվել էր քրեական գործ՝ ՀՀ քրեական օրենսգրքի 130-րդ հոդվածի 2-րդ մասով և նշանակվել էր դատաբժշկական փորձաքննության:
Դատաբժշկական փորձաքննության եզրակացության համաձայն՝ կնոջ մոտ հայտնաբերվել է ծննդաբերական պատռվածք, արտաքին սուր արյունահոսություն, ներքին օրգանների և անոթների սուր արյունապակասություն, որն էլ հանգեցրել է մահվան։
Քրեական գործով բավարար ապացույցներ են ձեռք բերվել, որ ծննդկանին բուժօգնություն ցուցաբերելիս մանկաբարձ-գինեկոլոգների կողմից իրենց մասնագիտական պարտականությունների կատարման նկատմամբ դրսևորվել է անբարեխիղճ վերաբերմունք, չեն ձեռնարկվել անհրաժեշտ բուժմիջոցառումներ, որն էլ գտնվում է պատճառահետևանքային կապի մեջ հետծննդյան շրջանում ծննդկանի մոտ արյունահոսական բարդությունների շարունակական զարգացման և նրա մահվան հետ:
Դավիթ Շահվերդյանին մեղադրանք է առաջադրվել՝ ՀՀ քրեական օրենսգրքի 130-րդ հոդվածի 2-րդ մասով։
Գործը մակագրվել է դատավոր Սուսաննա Գզոգյանին:
00:00:00
