Ադրբեջանի ԱԳՆ խոսնակ Այհան Հաջիզադեն Հայաստանին մեղադրել է «ԿԽՄԿ-ի չարաշահման» մեջ։ Այս մասին նա գրել է թվիթթերում։
Նա պնդում է, թե «Լաչինի անցակետը ստեղծվել է Ադրբեջանի կողմից իր ինքնիշխան տարածքում, եւ ոչ ոք չի կարող կասկածի տակ դնել դրա լեգիտիմությունը, թեեւ 2020 թվականի նոյեմբերի 9-ի եռակողմ հայտարարության համաձայն՝ միջանցքի ֆունկցիան այլ է։
Մեղադրելով Հայաստանի ԱԳՆ-ին «ապատեղեկատվություն տարածելու» մեջ՝ Հաջիզադեն հայտարարել է, որ «68-ամյա Վագիֆ Խաչատուրյանը միջազգային հետախուզման մեջ է՝ կապված Խոջալուի դեպքերի հետ» (այդ մեղադրանքը հապճեպ հորինվել է ապօրինի ձերբակալությունից հետո-խմբ․):
Ընդ որում, նրա խոսքով, «Հայաստանը չարաշահում է ԿԽՄԿ-ի գործունեությունը», եւ «ներողություն խնդրելու եւ ռազմական հանցագործներին պատասխանատվության ենթարկելու փոխարեն Հայաստանի պաշտոնատար անձինք նախկինի պես փորձում են արդարացնել անօրինական գործողությունները»։
Ավելի վաղ Հայաստանի ԱԳՆ-ն Ադրբեջանի գործողությունները որակել է որպես ռազմական հանցագործություն:
