Լեռնային Ղարաբաղի Հանրապետության նախագահ Արայիկ Հարությունյանն ասել է, որ Ղարաբաղը շարունակելու է ինքնորոշման պայքարը և կոչ է արել Հայաստանի իշխանություններին զգույշ լինել Ադրբեջանի տարածքային ամբողջականության ճանաչման հարցում իրենց հայտարարություններում։
«Ոչ մի երկիր չի կարող մեզ զրկել ինքնորոշման իրավունքից։ Ես կոչ եմ անում Հայաստանի իշխանություններին ավելի զգույշ լինել իրենց հայտարարություններում։ Ինքնորոշման իրավունքը միջազգային նորմ է, մեր իրավունքը, որը մենք օգտվում ենք նաև այսօր», - ասել է Հարությունյանը` պատասխանելով «Ինտերֆաքս»-ի հարցին:
Նա նշել է, որ, անկախ հայտարարություններից, Լեռնային Ղարաբաղը «կշարունակի պայքարն ինքնորոշման համար»։
Հարությունյնաը նաև նշել է, որ պատրաստ է Բաքվի հետ երկխոսության, որը «պետք է նաև հաշվի առնի մեր իրավունքները և վարվի հավասարության սկզբունքով»։
Հարությունյանը հայտարարել է, որ Լաչինի միջանցքը, որը կապում է Լեռնային Ղարաբաղը Հայաստանի հետ, պետք է ապաշրջափակվի՝ կանխելու հումանիտար աղետը և սննդամթերքի առաքումը, բայց, միևնույն ժամանակ, դեմ է արտահայտվել Բաքվից Բարդա-Աղդամ ճանապարհով սնունդ մատակարարելու Ադրբեջանի առաջարկին։
Նա նշել է, որ Լեռնային Ղարաբաղում տեղակայված ռուս խաղաղապահները նույնպես դժվարություններ ունեն պարենով ապահովելու հարցում, և «նրանք օգտվում են նաև սննդի մեր սուղ պաշարներից»։
