«Սա ակնհայտ լկտի սուտ է եւ զառանցանք: Պաշտոնապես հայտարարում եմ ՀՀ սահմաններից դուրս ոչ ես, ոչ ընտանիքիս որեւէ անդամ եւ մերձավոր ազգական ոչ միայն կղզի, այլ նաեւ սեփական կատու չունեմ»,-նշել  է ԱԺ փոխխոսնակ Էդուարդ Շարմազանովը՝ արձագանքելով սոցցանցերում տարածված տեղեկությանը, թե Շարմազանովը աներորդու անունով սեփական կղզի ունի Հունաստանում: Հարցին, թե ո՞ւմ է ձեռնտու նման ապատեղեկատվություն տարածելը, Շարմազանովը նշել է, որ տեղեկատվության հեղինակը ԱՄՆ-ում գրանցված ֆեյք էջ է, որի «հետեւից գնալու , պատասխանատվության ենթարկելու հնարավորություն չկա»: Ասել է՝ կռահում է, թե ով կամ ովքեր են այս խառը օրերից օգտվելով՝ պղտոր ջրում ձուկ որսում ու փորձում հանրային ուշադրությունը լուրջ գործընթացներից շեղել: «Պարոնայք ֆեյքատերեր, ուրիշի վրա ցեխ շպրտելով՝ դուք չեք մաքրվելու, զբաղվեք լուրջ գործով»,-եզրափակել է Էդուարդ Շարմազանովը: