«ՀՀԿ Գործադիր մարմնում արտահերթ ընտրությունների հարց չի քննարկվել»,- լրագրողների հետ զրույցում ասաց ՀՀԿ մամլո խոսնակ, ԱԺ փոխնախագահ Էդուարդ Շարմազանովը: Նրա խոսքով՝ արտահերթ ընտրությունների մեկ տարբերակ կա՝ կառավարության ծրագրի տապալում. «Հաշվի առնելով վարչապետ Փաշինյանի հայտարարությունը՝ գործադիր իշխանության ներկայացուցիչների վճռական վերաբերմունքը՝ բերել հավակնոտ կառավարության ծրագիր, բնականաբար այս փուլում (առաջիկա 1-2 ամսում) ես չեմ տեսնում իրավական որևէ լուծում՝ արտահերթ ընտրությունների գնալու համար»: Շարմազանովի խոսքով՝ ում դուրը կգա, ում դուրը՝ ոչ, բայց այս պառլամենտը ընտրվել է լեգալ ու լեգիտիմ. «Միգուցե, այո, այսօր այլ քաղաքական իրողություն է, բայց եթե այդպես նայենք, յուրաքանչյուրը 6 ամիսը մեկ մենք կունենանք ընտրություն»: ԱԺ փոխխոսնակը նշեց, որ արտահերթ ընտրությունների հարցը պետք է քննարկվի պառլամենտական, արտախորհրդարանական ուժերի հետ միասին. «Մենք հարգում ենք գործադիր իշխանության կարծիքը, բայց մենք, մեծ հարգանք ունենալով բոլոր քաղաքական ուժերի նկատմամբ, չենք լինելու կառավարության կցորդը, լինելու ենք կառավարության գործընկերը և արհեստականորեն չենք խոչընդոտելու Փաշինյանի կառավարության աշխատանքներին»: