Երկիր մոլորակին սպառնում է կենդանի էակների զանգվածային բնաջնջում կլիմայի փոփոխության եւ մոլորակի բնական հարստությունների անխնա շահագործման պատճառով, գրել է բրիտանական Daily Mail թերթը՝ վկայակոչելով ավստրալացի եւ եվրոպացի գիտնականներին:
Մասնագետները գերհամակարգչի օգնությամբ երկրի մոդել են ստեղծել՝ ավելի քան 15 հազար սննդային շղթաներով։ Նրանք եզրակացրել են, որ ամենավատ սցենարում կենդանիների և բույսերի բոլոր տեսակների շրջանում մինչև տասը տոկոսը կվերանա մինչև 2050 թվականը, իսկ մինչև 2100 թվականը՝ մինչև 27 տոկոսը: Միջին սցենարը ենթադրում է կենսաբազմազանության 13 տոկոսի կորուստ մինչև դարի վերջ:
Գիտնականները ենթադրյալ փոփոխությունների պատճառ են համարել գլոբալ տաքացումը եւ մարդու գործունեությունը։
Հետազոտողները ասում են, որ այս գործընթացները գնահատելու նախորդ մոտեցումները սխալ էին, քանի որ դրանք հաշվի չէին առնում համատեղ ոչնչացումը, որը տեղի է ունենում որոշ տեսակների՝ մյուսներից փոխկախվածության պատճառով:
Մասնագետները պարզաբանել են, որ կենդանիների զանգվածային անհետացումը, որոնք որս են եղել գիշատչի համար, կհանգեցնի նաեւ վերջինիս մահվան։
Ընդհանուր առմամբ, համատեղ ոչնչացումը մինչև դարի վերջ կբարձրացնի առավել խոցելի տեսակների կորստի ընդհանուր մակարդակը 184 տոկոսով: Նոր արդյունքները ցույց են տալիս, որ կլիմայի փոփոխությունից և բնական ռեսուրսների շահագործումից վնասը շատ ավելի մեծ կլինի, քան նախկինում ենթադրվում էր, ավելացրել են հետազոտության հեղինակները:
