Երկու տարի առաջ զորացրվելուց հետո Դավիթ Խլղաթյանը 2020 թվականի 44- օրյա պատերազմի ժամանակ մեկնում է ռազմաճակատ։ Դավիթը Արմավիրի մարզի Ակնալիճ համայնքից էր։ Ապրում էր ծնողների և երկու եղբայրների հետ։ Պատերազմի հաջորդ օրը՝ սեպտեմբերի 28-ին «պավեսկա» է ստացել, որ պետք է մեկնի Արցախ։ Դավիթն առանց մեկ րոպե մտածելու հագնում է զինվորական համազգեստն ու շտապում Արցախ։
Դավիթի հարազատներից Գայանե Արշակյանը Irakanum.am-ի հետ զրույցում ասաց, որ Դավիթը մշտապես հայրենասեր է եղել, և ծառայությունից հետո երբ ամեն անգամ թշնամին խախտում էր հրադադարի ռեժիմը, Դավիթն անհանգստանում էր։ Զինվորական համազգեստով էր զորացրվել, այն խնամքով պահում էր պահարանում, ասելով, որ մի օր պետք կգա։
«Ամսի 28-ից եղել է պատերազմի դաշտում, զոհվել է Ֆիզուլիում։ Հոկտեմբերի 24-ին է վերջին անգամ խոսել մոր հետ, դրանից հետո որեւէ տեղեկություն չենք ունեցել։ Երեք ամիս շարունակ փնտրել ենք, հետո պարզվել է, որ Գորիսի դիահերձարանում է, դրանից հետո բերել են Էջմիածնի դիահերձարան հունվարի 4-ին, հունվարի 5-ին էլ դիակը մեզ են տվել, հաջորդ օրը՝ հունվարի 6-ին եղբոր ծննդյան օրը հանձնել ենք հողին»,- պատմեց Դավիթի մորաքրոջ աղջիկը։
22 տարեկան էր Դավիթը։ Բանակից հետո այգեգործությամբ էր զբաղվում։ «Հիմնել էր 15 հեկտար այգի, ամեն օր աշխատում էր, ծնողներին օգնում, ամեն ինչ անում էր ընտանիքի համար»,- ասաց Գայանե Արշակյանը։
Վերջին անգամ Դավիթը մոր հետ խոսել է հոկտեմբերի 24-ին։ «Մորաքուրս ասել է, որ Դավիթ հեռուստացույցով վատ բաներ են ասում, ասել է մամ մի լսեք, անջատեք, խափում են։ Միշտ հանգստացնում էր ընտանիքի անդամներին, բայց վերջին անգամ նաև ասել է, որ իրենց լավ նայեն»,- պատմեց Գ․ Արշակյանը։
Դավիթ Խլղաթյանին հուղարկավորել են հայրենի գյուղի գերեզմանատանը։
Irakanum.am
