Երեւանի «Ոսկե ծիրան» 19-րդ միջազգային կինոփառատոնն այս տարի տեղի կունենա հուլիսի 10-17-ը։ Փառատոնի տարբեր ծրագրերի շրջանակում կցուցադրվի շուրջ 100 ֆիլմ՝ Կաննի, Բեռլինի եւ այլ միջազգային կինոփառատոններից։ Այս եւ այլ մանրամասների շուրջ կինոտոնի ներկայացուցիչները խոսեցին այսօր՝ հունիսի 17-ին կայացած ասուլիսի շրջանակում։
ՀՀ կրթության, գիտության, մշակույթի, սպորտի նախարարի տեղակալ Արա Խզմակյանը նկատեց՝ «Ոսկե ծիրան»-ը Հայաստանի մշակութային կյանքի ամենակարեւոր իրադարձություններից է,-«Ես հույս ունեմ, որ «Ոսկե ծիրանը» համավարակի սահմանափակումների ճանապարհը, աստիճանաբար, հաղթահարելով կվերականգնի իր ծավալները»,-նշեց նա։
Երեւանի քաղաքապետարանը փառատոնի այս տարվա գլխավոր հովանավորն է։ Երեւանի քաղաքապետի առաջին տեղակալ Լեւոն Հովհաննիսյանը, անդրադառնալով փառատոնի հետ համագործակցությանը, հավելեց,-«Երեւանի քաղաքապետարանն առաջին անգամ է, որ հովանավորում է փառատոնը։ «Ոսկե ծիրանը» շատ կարեւոր կինոտոն է, եւ կարծում եմ՝ տրամաբանական է, որ մենք եւս մասնակիցն ենք դրա․ վստահ եմ, որ շատ լավ արդյունքներ են գրանցվելու։ Մենք այս տարի բավական շատ միջոցառումներ ենք նախատեսում կազմակերպել, իսկ «Ոսկե ծիրանը» երեւանյան մշակութային կյանքում առանձնահատուկ տեղ է զբաղեցնում»։
Փառատոնն այս տարի կունենա երեք մրցութային ծրագիր։ Կինոփառատոնի լիամետրաժ ֆիլմերի միջազգային մրցույթի ժյուրիի նախագահն է իռլանդացի օսկարակիր սցենարիստ, ռեժիսոր Թերի Ջորջը, որը երկու անգամ առաջադրվել է Օսկար մրցանակաբաշխությանը՝ «Լավագույն սցենար» անվանակարգում, իսկ 2012-ին «Լավագույն կարճամետրաժ ֆիլմ» անվանակարգում արժանացել է Օսկար մրցանակի։
Թերի Ջորջից բացի, լիամետրաժ ֆիլմերի ժյուրիի կազմում ընդգրկված են Ամստերդամի վավերագրական ֆիլմերի փառատոնի (IDFA) տնօրեն Օրվա Նիրաբիան, օպերատոր, Կաննի կինոփառատոնի օպերատորական մրցանակի դափնեկիր Վլադիսլավ Օպելյանցը, իսպանացի ռեժիսոր, Սան Սեբաստիանի միջազգային կինոփառատոնի գլխավոր մրցանակի դափնեկիր Իսակի Լակուեստան, Կաննի կինոփառատոնի մասնակից «Երբ որ քամին հանդարտվի» ֆիլմի ռեժիսոր Նորա Մարտիրոսյանը։
Հատուկ փառատոնին մասնակցելու համար Հայաստան կժամանեն մի շարք պատվավոր հյուրեր, նրանց թվում են՝ իսպանացի կինոռեժիսոր, Լոկառնոյի կինոփառատոնի գլխավոր մրցանակակիր, Կաննի կինոփառատոնի մրցանակակիր Ալբերտ Սեռան, Եվրոպական կինոյի առաջառար պրոդյուսեր, 35-ից ավելի փառատոնների մրցանակակիր, Կաննի կրկնակի մրցանակակիր ֆիլմերի պրոդյուսեր Ֆիլիպ Բոբերը, DAU բազմապլատֆորմ մարդաբանական կինոնախագծի հեղինակ Իլյա Խրժանովսկին եւ այլք։
Փառատոնը նաեւ հարգանքի տուրք կմատուցի անվանի կինոգործիչներ Յուրի Երզնկյանի, Լաերտ Վաղարշյանի, Ալեն Ռենեի, Պիեռ Պաոլո Պազոլինիի հոբելյաններին։
Երեւանի «Ոսկե ծիրան» 19-րդ միջազգային կինոփառատոնի մեկնարկը կտրվի Մայքլ Գյուրջյանի «Ամերիկացի» ֆիլմով։ Փառատոնի բացման պաշտոնական արարողությունը կկայանա հուլիսի 10-ին Արամ Խաչատրյան համերգասրահում։ Փառատոնը կփակվի Գարին Հովհաննիսյանի «Չտեսնված հանրապետություն» կինոնկարով։
