Դիմադրություն շարժման անդամները, որոնք մի քանի ժամ փակ էին պահում Կառավարության բոլոր մուտքերը, երթով շարժվում են դեպի Կառավարական ամառանոց։
«Մենք գնացինք Ազգային ժողով, իրենց ամբողջ խմբակցությունը փախավ։ Եկանք Կառավարություն, փախավ գլխավոր դավաճանը։ Ես ունեմ տեղեկություններ, որ ինքն այժմ գտնվում է Կառավարական ամառանոցում։ Առաջարկում եմ բացել բոլոր մուտքերը եւ շարժվել դեպի ամառանոց»,- հայտարարեց ԱԺ փոխխոսնակ, ՀՅԴ ԳՄ ներկայացուցիչ Իշխան Սաղաթելյանը։
Հիշեցնենք, որ ԱԺ ընդդիմադիր «Հայաստան» եւ «Պատիվ ունեմ» խմբակցությունները այսօր՝ հունիսի 3-ին, նախաձեռնել էին ԱԺ արտահերթ նիստ, որի օրակարգում ԱԺ հայտարարության նախագիծն է Հայ-ադրբեջանական եւ հայ-թուրքական հարաբերությունների կապակցությամբ, սակայն ՔՊ-ական պատգամավորները չեն ներկայացել նիստին եւ տապալել այն:
Դրանից հետո ընդդիմադիր պատգամավորները վերադարձել են Ֆրանսիայի հրապարակ, որտեղից էլ երթով հասել են Կառավարության շենք եւ շրջափակել բոլոր մուտքերը:
«Որեւէ մեկը շենք մտնելու փորձ չանի: Կառավարության բոլոր 6 մուտքերը փակում ենք, հետո ես կվերադառնամ էստեղ, մեր բոլորի պահանջը կհնչեցնեմ: Ոստիկանների հետ կոնֆլիկտի մեջ չենք մտնում»,- հայտարարել էր Սաղաթելյանը:
