Ներկայիս իշխանություններն այնպես կադրային փոփոխություններ իրականացրեցին, որ զինված ուժերի ռազմական կառույցը քաղաքականացվեց՝ ճնշումների միջոցով իրենց ենթարկելու նպատակով։ Այս մասին մայիսի 14-ին քննարկման ժամանակ ասաց «Հայաստան» խմբակցության ղեկավար, ՀՀ պաշտպանության նախկին նախարար Սեյրան Օհանյանը։
Նրա խոսքով՝ կազմակերպչական փոփոխություններ են իրականացվել, որոնք ազդել են զինված ուժերի զարգացման եւ վերազինման ծրագրերի իրականացման վրա, հարված է հասցվել բանակում կարգապահությանը։
Նա վստահ է, որ այս ամենը, ինչպես նաեւ պատերազմի ժամանակ Հայաստանի իշխանությունների անհեռատես գործողությունները, սխալ որոշումների հանգեցրեցին:
«Հայկական զինված ուժերի զարգացման համար անհրաժեշտ է բարեփոխումների հայեցակարգ մշակել, որը գոյություն չունի։ Շատ կարեւոր է բարձրացնել մարտական ոգին դաստիարակչական աշխատանքով։ ԶՈւ-ն ի վիճակի է կատարել հակառակորդի գործողություններին հակազդելու առաջադրանքները, անհրաժեշտ է միայն պետության աջակցությունը: Վերջապես, անհրաժեշտ է վերազինման եւ ժամանակակից ռազմական տեխնիկայի ձեռք բերման ծրագիր իրականացնել։ Այս ամենը կարելի է 4-5 տարում արագ կյանքի կոչել»,- հավելեց նախկին նախարարը։
