«Քաղաքացիական պայմանագիր» կուսակցությունն այսօր հրապարակել է դեկտեմբերի 5-ին Շիրակի, Արմավիրի, Արարատի, Տավուշի, Լոռու, Վայոց ձորի և Արագածոտնի մարզերում կայանալիք ՏԻՄ ընտրություններում կուսակցության համամասնական ցուցակները գլխավորող անձանց անունները:

Ուշագրավ է, որ ՔՊ-ն մի շարք համայնքներում առաջադրել է թեկնածուների, ովքեր սերտ առնչություն են ունեցել նախկինների հետ։

Irakanum.am-ը դեռ երեկ էր հրապարակել, որ Շիրակի մարզի Արթիկ խոշորացված համայնքի ղեկավարի պաշտոնում «Քաղաքացիական պայմանագիր» կուսակցությունն առաջադրելու է Պեմզաշեն համայնքի ղեկավար Անանիկ Ոսկանյանի թեկնածությունը։ Վերջինս ԵԿՄ անդամ է, Մանվել Գրիգորյանի սանիկը։

Արագածոտնի մարզի Ապարան քաղաքի քաղաքապետի թեկնածու ՔՊ-ն առաջադրել է Էդգար Փարվանյանի թեկնածությունը։ Նա է գլխավորելու ՔՊ-ի ավագանու ցուցակը։ Փարվայանը Ապարանում հեղինակություն է համարվում, նա զովացուցիչ ըմպելիքների արտադրությմաբ զբաղվող «Ապարան Գրուպ» ընկերության տնօրենն է։ Վերջինս Սերժ Սարգսյանի կառավարման տարիներին անդամակցել է ՀՀԿ-ին, հիմա պարզվում է ճամբարափոխ է եղել և դարձել է իշխանության «սիրելին», չնայած այն հանգամանքին, որ բնավ չի քայլել։ Բայց հիմա ՔՊ-ն տեղ ու պաշտոն է տալիս նաև նրանց, ովքեր 2018-ին չեն քայլել։

Արագածոտնի մարզի Աշտարակ քաղաքի քաղաքապետի թեկնածու ՔՊ-ն առաջադրել է գործող քաղաքապետին՝ Թովմաս Շահվերդյանին։ Վերջինս ևս մինչև 2018-ի իրադարձությունները ջանասիրաբար աշխատել է ՀՀԿ-ի համար, «վիզ» դրել, որ Սերժ Սարգսյանի ղեկավարած կուսակցությունը զգալի ձայներ ստանա Աշտարակում։ Նա էլ դասվեց ճամբարափոխների շարքում։

Վայոց Ձորի Ջերմուկ խոշորացված համայնքի ղեկավարի ՔՊ-ի թեկնածուն էլ Վահագն Արսենյանն է։ Նա ՀՀԿ-ական նախկին պատգամավոր Աշոտ Արսենյանի որդին է։ Արսենյանները կարկառուն Հանրապետական են եղել։ Ավելին Աշոտ Արսենյանը բավականին մտերիմ հարաբերությունների մեջ է եղել Սերժ Սարգսյանի հետ, բայց ինչպես հետագայում ցույց տվեցին զարգացումները, պաշտոնն ավելի կարևոր է։

Մի շարք համայնքներում ևս ՔՊ-ն հույսը դրել է նախկինների վրա։ Ըստ երևեույթին Գորիսում և Գյումրիում կրած պարտությունն է պատճառը դարձել, որ իշխանությունը որոշել է այս ընտրություններում նախապատվությունը տալ նախկին ՀՀԿ-ականներին, կամ Հանրապետականի հետ սերտ առնչություն ունեցող թեկնածուների։

Irakanum.am