«Տարիներ առաջ ռեփ էի կարդում, հետո հիփ-հոփ ոճում էի ստեղծագործում, հիմա էլ իմ երգերն առավել շատ էլեկտրոնային երաժշտությամբ են ուղեկցվում… Հեղափոխական հիմնը բավական լուրջ ու պարտավորեցնող աշխատանք է, ռոքային մոտեցում է պահանջում: Մխիթարին խորհուրդ տվեցի, թե այդ ոճում որ երգիչներին ու խմբերին ճիշտ կլինի դիմել: Բայց մի քանի օր անց եղբայրս զանգեց ու ասաց՝ վախեցել ու ոչ-ոք չի համաձայնվել հեղափոխական երգ կատարել: Դե, ես վախեցող ու ոչինչ չանող երգիչների դասին չեմ պատկանում, 2008 թվականին էլ եղել եմ ցույցերի մեջ», - Aysor.am-ի հետ զրույցում պատմեց Հայկ Ստվերը: Ըստ երգչի՝ խոսքերի հեղինակ Նիկոլ Փաշինյանը սկզբում իր կատարմանը լուրջ չէր վերաբերվում, բայց լսելով երգի փորձնական ձայնագրությունը, անակնկալի է եկել: «Նիկոլ Փաշինյանը սա գրել էր որպես բանաստեղծություն: Երգն ի սկզբանե կրկներգ չուներ, ես վերցրեցի վերջին տունն ու մեկ օկտավա վերևից ավելացնելով՝ կրկներգ դարձրեցի: Ժամանակը շատ սուղ էր, այս ամենի համար ընդամենը 5 օր ինձ տվեցին, պետք է հասցնեի և՛ գործիքավորումն ու ձայնագրությունը, և՛ հետձայնագրման աշխատանքները: Ասեմ, որ ձայնագրման ծախսը, որը այլ ստուդիայում եմ արել, իրենք են հոգացել, մնացածն, ինչ ինձանից էր կախված՝ ես եմ արել», - նշեց Հայկ Ստվերը: Հայկ Ստվերը ոչ միայն «Իմ քայլը» նախաձեռնության հիմնի երգիչն է, այլև՝ շարժման գաղափարակիցը: Ինչպես արդեն իսկ իր խոսքում նշել է՝ Նիկոլ Փաշինյանի գործունեությանը հետևում է դեռևս 2008 թվականից: Այդ ժամանակ ցույցերի մեջ ակտիվն ինքն էր, պասիվը՝ եղբայրը՝ Մխիթարը:   https://www.youtube.com/watch?v=C9UlCRQlWls